„Епл“ сака Сири да мисли со мозокот на „Гугл“

Технолошкиот гигант „Епл“ (Apple Inc.) е во рана фаза на разговори со „Гугл“ (Google) за можноста да го користи Џеминај (Gemini), моделот за вештачка интелигенција (ВИ) на оваа компанија, како основа за новата верзија на гласовниот асистент Сири (Siri). Овој потег би можел да претставува значаен пресврт во стратегијата на „Епл“ за развој на генеративна вештачка интелигенција.

Според извори запознаени со преговорите, „Епл“ се обратил до матичната компанија на „Гугл“, „Алфабет“ (Аlphabet Inc.), со цел да се истражи можноста за изработка на прилагоден ВИ модел кој би работел на сервери на „Епл“ и би станал основа на новата Сири веќе од следната година. Преговорите сè уште се во рана и неофицијална фаза, без формални комерцијални договори.

„Епл“ истовремено разгледува и други опции. Компанијата претходно имала слични разговори со „Опен еј-ај“ (OpenAI) и „Антропик“ (Anthropic), разгледувајќи дали ЧетГПТ (ChatGPT) или Клод (Claude) би можеле да бидат новиот „мозок“ зад Сири. Сепак, сѐ уште не е донесена конечна одлука дали „Сири“ ќе продолжи да се развива со интерни модели или преку партнерство со надворешна компанија.

Овие разговори доаѓаат по значајни доцнења во развојот на новата генерација на Сири. Првично планирана за објава во пролетта 2025 година, надградбата беше одложена поради технички предизвици. Како резултат на тоа, „Епл“ направи структурни промени — шефот за ВИ, Џон Џанандреа беше отстранет од проектот, кој сега е под раководство на Крег Федериги и Мајк Роквел, водечки личности во развојот на софтверот и „вижн про“ (Vision Pro) уредот.

Внатрешно, „Епл“ развива две верзии на Сири: една под името Линвуд (Linwood), базирана на сопствени модели, и друга наречена Гленвуд (Glenwood), која се потпира на надворешна технологија. Овој процес се одвива како „натпревар“ меѓу различните пристапи, при што конечната одлука ќе зависи од тоа кој модел ќе покаже најдобри резултати.

Иако „Антропик“ претходно беше водечки кандидат за партнерство, наводно поради високите финансиски барања од нивна страна, „Епл“ го прошири кругот на потенцијални партнери и повторно ја разгледува опцијата со „Гугл“.

Интеграцијата на ЧетГПТ со Сири како резервна опција за општи прашања веќе е дел од функциите на „Епл Интелиџенс“, а слична интеграција со Џеминај исто така е на повидок. Иако „Епл“ и „Гугл“ се ривали на пазарот на мобилни уреди и оперативни системи, тие веќе имаат профитабилно партнерство — „Гугл“ плаќа милијарди долари годишно за да остане стандардниот пребарувач на „Епл“ уредите. Сепак, овој договор е под лупа на американското Министерство за правда поради можен антимонополски прекршок.

Во меѓувреме, ВИ тимот на „Епл“ се соочува со нови предизвици. Во јули, главниот архитект на моделите, Руоминг Панг, премина во „Мета“ со понуда вредна 200 милиони долари, станувајќи дел од нивната новата единица за суперинтелигенција на компанијата.

Во моментов нема коментари за веста. Биди прв да коментира...

Остави коментар