Натамошното затегнување на монетарните политики може да биде ризик за корекции на пазарите со акции и обврзници, предупредува аналитичкиот тим на „Блумберг Адрија“ во најновата анализа. Според нив, оваа година почна добро. Глобалните акции и обврзници забележаа позитивен тренд во првите пет месеци од 2023 година поради забавувањето на инфлацијата и оптимистичките прогнози за профитот на компаниите во следните 12 месеци.
И во регионот Адрија берзите бележат позитивни резултати од почетокот на оваа година, со исклучок на индексите во Босна и Херцеговина, кои се во негатива.
Словенечкиот SBITOP, хрватскиот Crobex10 и српскиот Belex15 беа подобри од поширокиот европски репер Stoxx600, како и од полскиот, унгарскиот, романскиот и бугарскиот индекс. Македонскиот берзански индекс (MБИ10) годинава бележи раст од 3,4 отсто споредено со лани.
Кога станува збор за дивидендите, словенечките компании веќе неколку години се меѓу лидери во регионот, со пондериран просечен дивиденден принос од 6,5 проценти во 2022 година, додека очекуваниот дивиденден принос на SBITOP од 4,7 проценти оваа година треба да биде најголем во регионот.
Некои од компаниите што го сочинуваат индексот Crobex10 сè уште немаат одлука за исплата на дивиденда, но, судејќи според предлозите на раководствата, пондерираниот просечен дивиденден принос од 3,1 отсто треба да биде многу блиску до ланскиот резултат од 3,2 отсто.
Belex 15 исто така нуди солидна дивиденда благодарение на нафтената компанија НИС, која сочинува 20 отсто од индексот. И македонските компании редовно исплаќаат дивиденди, што не е случај со босанските.
Целиот извештај можете да го прочитате овде.
Во однос на државните обврзници, поради пониската инфлација во однос на минатата година, сите земји од регионот од почетокот на годината бележат пад на приносите на петгодишните обврзници - освен Хрватска.
Имено, Хрватска минатата година веќе ги приспособи приносите поради очекуваниот влез во еврозоната како позитивен фактор (петгодишниот принос во август 2022 година беше два отсто), што подоцна беше проследено со мала нагорна корекција.
„Структурно гледано, може да се види потенцијал за натамошно намалување на приносите на хрватските обврзници на нивоата на Португалија (2,65 отсто), Шпанија (2,95 отсто) и Словенија (2,99 отсто), со оглед на сличните економски показатели за јавниот долг и буџетскиот дефицит. Србија, Словенија и Босна и Херцеговина исто така ги намалија приносите од 25 базични поени до 50 базични поени од почетокот на годината, благодарение на посилниот апетит за ризик и подобриот профил на економиите оваа година. Македонија бележи помало намалување на приносите и зголемување на разликата во однос на одредниците пред сè поради послабата ликвидност“, објаснуваат од нашиот аналитички тим.
Со оглед на забавувањето на инфлацијата и веќе пресметаните зголемувања на каматните стапки на централните банки, нашиот аналитички тим смета дека приносите на обврзниците годинава ќе стагнираат.
Клучна улога на пазарот на обврзници може да има потенцијалниот пресврт во политиките на централните банки, односно најава за намалување на каматните стапки.
„Што се однесува до акциите, очекуваме дека притисокот врз маргините на компаниите ќе се намали поради падот на цените на влезните трошоци (на пример цените на нафтата и гасот), а тоа, пак, може да го отвори патот за раст на цените на акциите. Со оглед на предизвиците во економиите што го ограничуваат потенцијалот за раст, фокусот на инвеститорите денес повеќе е насочен кон способноста на компаниите да ја подобрат или барем да ја одбранат профитабилноста. Регионот Адрија има свои специфичности, како што се ниската ликвидност и малиот број котирани компании, што значи дека надворешните влијанија се пренесуваат побавно. Повисоки дивиденди би можеле да привлечат странски инвеститори, особено на берзата во Босна и Херцеговина, каде што приносите од дивиденди се најниски“, истакнуваат аналитичарите на „Блумберг Адрија“.
Тие нагласуваат дека во регионот, кога станува збор за издавање државни обврзници, забележуваат два вида диверзификација. Првата е географска, преку издавање на повеќе пазари, а втората е преку мотивирање на малите инвеститори (или активирање на граѓаните) да имаат поголемо учество. Целта и на двата метода е да се обезбеди поевтино задолжување.
Македонската влада се врти кон граѓаните - ќе нуди народни обврзници
Словенечката влада објави дека размислува за издавање обврзници во американски долари, јапонски јени и кинески јуани. Иако на тие пазари може да се постигне нешто поевтино номинално задолжување, вкупниот трошок за задолжување сепак зависи од трошоците за валутна заштита, кои обично се вклучени (преку валутни свопови) во цената на емисијата.
„Другиот начин на диверзификација што го гледаме е најавата на македонската влада за издавање обврзници шо ќе бидат достапни за граѓаните во јуни 2023 година, во износ од 50 милиони евра. Се очекува каматната стапка да биде повисока од онаа што ја нудат банките за депозитите, но пониска од каматната стапка што државата ја добива на финансиските пазари. Тоа ќе биде втора ваква обврзница годинава во регионот Адрија, откако хрватската влада успешно емитуваше обврзница во износ од 1,5 милијарда евра, а се очекува уште една емисија во оваа земја до крајот на 2023 година. Кога станува збор за корпоративните обврзници, во регионот Адрија не гледаме голем интерес за вакви емисии поради сè уште прифатливите нивоа на каматни стапки на банкарските кредити“, објаснуваат нашите аналитичари и додаваат дека еден од позитивните примери е соопштението на српската „МК групација“ за можното издавање зелена обврзница.
Инверзната крива на приносите (негативната разлика помеѓу десетгодишните и двегодишните државни записи) честопати во минатото беше предвесник на рецесијата. Во моментов нема негативни разлики во однос на одредниците во регионот Адрија, но во САД и во еврозоната веќе некое време имаме токму такви знаци. Поради тоа инвеститорите очекуваат дека американската економија, како и еврозоната, наскоро ќе се соочат со рецесија (и бараат повисоки приноси на краток рок), додека долгорочно очекуваат смирување на економската состојба.
Нашиот регион сè уште е во подобра економска состојба од претходно споменатите економии, но доколку состојбата кај главните трговски партнери се влоши, тоа секако ќе влијае на трендот на приносите на обврзниците во регионот, со оглед на зависноста на регионот од европската економија.
„Во однос на импликациите на приносите на државните обврзници врз каматните стапки во локалните банкарски системи, очекуваме стапките на кредитирање да се движат нагоре до крајот на 2023 година. Во споредба со депозитите, каматните стапки на кредитите имаат повисок нагорен потенцијал, иако ова може да биде бавен процес. Банките ќе продолжат да ја следат политиката на централните банки и пазарните услови, но може да се очекуваат постепени зголемувања“, заклучуваат нашите аналитичари.
.webp){kind=icon}
