.webp){kind=icon}
Какви се трендовите во производството и дистрибуцијата на пазарот на електрична опрема во земјите од регионот Адрија е главното прашање на кое аналитичкиот тим на „Блумберг Адрија“ дава одговор во новата анализа објавена на „Блумберг Адрија инсајт“. Нашиот тим се фокусира на бизнисите во секторот на електрични компоненти и опрема што ги олеснуваат дистрибуцијата на електрична енергија и преминот кон производство на обновлива енергија.
„Очекуваме континуиран раст на продажбата од регионалната група компании што се предмет на споредба, иако со побавно темпо од она што беше забележано во 2021 и 2020 година“, велат аналитичарите.
Тие го објаснуваат ограничениот оптимизам со зголемените владини трошоци за инфраструктурни и други проекти, како и трајната потреба за автоматизација и за електрификација. Сепак, аналитичарите нагласуваат дека продажбата на компаниите од споредбената група е изложена на циклични сектори, како што се градежништвото и автомобилите, кои се сè поподложни на рецесија. Според нив, пазарните сегменти како нафтата и гасот се повнимателни и планираат да ја забават капиталната потрошувачка.
„Во однос на профитабилноста, намалувањето на цените на суровините и стабилизацијата на синџирот за снабдување во 2023 година ќе им дадат сила на маржите. Сепак, играчите ќе треба да ја искористат својата моќ за формирање на цените за да ја задржат главата над инфлацијата, со цел да ги заштитат маржите“, велат аналитичарите.
Главни наоди за индустријата
Аналитичкиот тим на „Блумберг Адрија“ пред сè се фокусира на индустриската примена на електронската опрема. Образложението е двојно. Прво, овие играчи се најголеми на регионалниот пазар (по продажба). Второ, тие утврдиле дека таа употреба е најрепрезентативна за пошироката индустрија. Според нив, двата главни двигатели се зголемената стапка на градење и на урбанизација и континуираните иновации.
„Индустријата се соочи со пад на нарачките во 2022 година по десетгодишниот максимум постигнат во 2021 година. Во 2022 година индустриската електрична опрема почувствува значителен удар кај нарачките, при што апаратите за домаќинство го презедоа водството во однос на растот на нарачките“, велат аналитичарите.
Тие додаваат дека глобалните играчи за електрична опрема влегоа во 2023 година со значително ниво заостаната работа и поволен сооднос помеѓу нарачките и испораките. Внесувањето нарачки исто така е во нагорен тренд од падот во 2020 година и ги надмина нивоата од пред пандемијата постигнати во 2019 година.
„Ги разгледавме макроекономските движења, обемот на клучните извозни пазари за регионот, цените на суровините и очекувањата за нарачки врз основа на анкетите. Германија е клучен партнер во сегментот на производство на електрична опрема за регионот Адрија. Секое значајно прашање во Германија веројатно ќе влијае на финансиските резултати на регионалните компании. Позитивната страна е што цените на инпутите се стабилизираат, што ќе го намали притисокот врз маржите“, велат аналитичарите.
Анализа на компаниите
Нашиот аналитички тим ја дели групата на компании што се предмет на споредба на две подгрупи: производители и дистрибутери. Станува збор за два различни деловни модела и тие се обидуваат да ги истакнат добрите и лошите финансиски страни на двата модела. Понатаму, ги разгледуваат само ентитетите во групата што работат строго со електрична опрема.
Производители
Според аналитичарите, регионалните играчи за производство на електрична опрема испорачаа робустен раст на приходите во просек од 22,8 проценти во 2022 година, што е пад во однос на растот од 27,5 проценти во 2021 година.
„Главни двигатели на продажбата беа приливот на нарачки и, следствено, повисоката стапка на договори, за жал со пониска стапка од постигнатите рекорди во 2021 година“, велат аналитичарите.
Дистрибутери
Тие укажуваат дека дистрибутерите забележаа пад на приходите во 2022 година во просек од минус 15,5 проценти.
„Сепак, мора да се забележи дека просеците на дистрибутерските компании се малку искривени поради влијанието од резултатите на ’Сименс’ од 2020 година. ’Сименс енерџи’ имаше пад на сите пазари во регионот освен во Словенија, додека ’Шнајдер’ успеа да го задржи ефектот на раст на продажбата во 2021-2022 година“, велат аналитичарите.
Според нив, прегледот на трошоците на производителите и на дистрибутерите дава лесен увид во нивниот оперативен профил и во профитабилноста.
„Имено, односот на трошоците за материјали и на трошоците за продажба јасно ја повлекува границата помеѓу производителите и дистрибутерите. Уделот на трошоците за услуги во продажбата кај дистрибутерите (18,3 проценти) е многу поголем од оној на производителите (10,1 проценти)“, велат аналитичарите.
Задолженост/ликвидност
Во анализата тие ѝ посветуваат големо внимание на задолженоста. Аналитичарите укажуваат дека играчите во регионот Адрија во просек немаат многу долгови - производителите во просек имаат повеќе долгови од дистрибутерите.
„Сепак, нема високи стапки на задолженост, при што кај производителите соодносот просечен нето-долг/ЕБИТДА е еден, додека оној на дистрибутерите е минус четири пати“, велат аналитичарите.
Во тандем со нето-долгот/ЕБИТДА, тие го разгледуваат и таканаречениот брз коефициент (acid test) за моментална ликвидност за мерење на квалитетот на билансот на состојба на компаниите од споредбената група.
„Производителите имаат просечен резултат од 1x кај стапката на есид-тестот. Чистите извозници, како што е „Итон“ (Eaton), покажуваат брзи коефициенти повисоки од просечните бидејќи практично сите побарувања се засноваат на нарачки и на нивните групи и тие се наплатуваат навремено. Словенечките производители што произведуваат покомплексна опрема во подолги проекти и имаат потреба од постојани инвестиции со цел да го зголемат капацитетот имаат резултат под 1x, бидејќи се потребни повеќе парични трошоци за финансирање на операциите“, велат аналитичарите.
Според нив, дистрибутерите се поликвидни, во просек, со брз коефициент, кој изнесува 1,2 пати во 2022 година, и тие можат да ги покријат краткорочните обврски со своите најликвидни средства.
Глобалните компании имаат просечен сооднос од 1,9 пати кај есид-тестот, повисок од просеците на двете врснички подгрупи.
„Ги разгледавме брзите коефициенти за глобалните играчи како што се ’Итон’, ’Аметек’ и ’Шнајдер’. Сè уште има простор за регионалните играчи да го зајакнат својот профил на ликвидност“, велат аналитичарите.
Нето обртни средства
Тие додаваат дека иако разгледувањето на обртните средства за бизниси базирани на проекти изгледа неразумно, сепак сметаат дека ваквата анализа е релевантна со оглед на тоа што се вклучени компании со квазисериско производство и со оглед на трендовите кај деновите за наплата на побарувањата и за покривање на обврските.
„Расчленувајќи ги бројките за обртните средства, може да се види дека просечните денови за плаќање на обврските на производителите (75,4) се повисоки од просечните денови за наплата на побарувања (52,9). Производителите можат да го финансираат своето работење односно обврските кон доставувачите од нивните побарувања“, велат аналитичарите.
Тие додаваат дека истото тоа важи и за дистрибутерите, меѓутоа кај нив разликата во деновите за плаќање на обврските и наплата на побарувањата е помала.
„Како и кај производителите, во изминатите три години доставувачите ги заоструваа условите и за дистрибутерите. Замките на синџирот на снабдување беа тема на индустријата во 2021 и 2022 година, а играчите што успеаја да се снајдат и покрај ограничувањата во синџирот за снабдување останаа неповредени“, велат аналитичарите.
Понатаму, тие навлегуваат во специфична анализа на компаниите, мерејќи ги силните и слабите страни на компаниите од споредбената група поединечно или на ниво на земја.
Компаниите од регионот Адрија наспроти глобалните компании
Нашите аналитичари велат дека просечните нивоа на ЕБИТДА на регионалните компании се послаби во споредба со глобалните компании до неколку процентни поени.
„Глобалните конгломерати ја користат својата величина за да ги диктираат цените и да го контролираат нивниот синџир на вредност, што им овозможува да жнеат супериорни нивоа профитабилност“, велат аналитичарите.
Тие посочуваат дека регионот Адрија ја надминува групата глобални компании што се предмет на споредба во однос на повратот на инвестираниот капитал (ROIC).
„Тоа најверојатно се должи на пониските нивоа на капитал што го поседуваат локалните играчи во споредба со компаниите од глобалната група“, велат аналитичарите.
Сооднос капитални трошоци/продажба
Од нашиот аналитички тим укажуваат дека просечниот сооднос капитални трошоци/продажба е значително разреден од дистрибутерите.
„Изолирајќи ги само дистрибутерите, нивниот просечен сооднос капитални трошоци/продажба изнесува околу 0,1 процент во 2022 година, додека производителите можат да се пофалат со сооднос од 5,3 проценти“, велат аналитичарите.
Тие објаснуваат дека на дистрибутерите не им се потребни големи капитални расходи и нагласуваат дека компаниите од регионот Адрија инвестираат повеќе од глобалните, во просек и во релативна смисла со цел да ја задржат конкурентноста.
За да направат резиме на анализата на компаниите од споредбената група, тие нудат матрица што ги сумира клучните области на работење и за регионалните и за глобалните играчи.
Очекувања
Од аналитичкиот тим на „Блумберг Адрија“ сметаат дека владините трошоци за надградба на мрежата и инфраструктурата (замена на старата инфраструктура) исто така треба да ја поттикнат побарувачката.
„Сепак, економското забавување во Германија и во Италија (главните извозни партнери за регионот) ни дава причина да подразмислиме за понатамошниот раст на продажбата. Песимистичките нивоа на нарачки исто така нè тераат да се сомневаме во силата на заостанатите нарачки во иднина“, велат аналитичарите.
Тие гледаат големи можности во регионот за инвестирање во обновливи извори на енергија.
„Според прогнозите на ИЕА, 60 проценти од целокупното производство на електрична енергија ќе дојде од обновливи извори на енергија до 2040 година. Потребата за овие технологии сигурно ќе се прелее во регионот Адрија во форма на инвестиции во вакви проекти“, велат од нашиот аналитички тим.
