Најновите проекции за кредитниот пазар упатуваат на умерено забавување на кредитната активност во 2022 година и стабилизирање на стапките на раст во наредните две години, соопшти Народната банка во најновиот квартален извештај.
„Иако во првиот квартал на 2022 продолжи трендот на забрзан годишен раст на кредитите, сепак до крајот на годината се очекува умерено забавување на стапката на раст, којашто ќе изнесува 7,7 отсто (8,3 отсто на крајот на 2021 година). Забавувањето главно произлегува од очекуваната послаба економска активност и поумерениот раст на депозитната база. Со забрзување на домашната економска активност и постепеното враќање на довербата, во следниот период се очекува дека кредитирањето на приватниот сектор ќе продолжи со слична динамика на раст (7,6 отсто во просек за периодот 2023 ‒ 2024 година)“, се вели во извештајот на Народната банка.
Од аспект на депозитите, како основен извор на финансирање на кредитната активност во домашниот банкарски систем, оцените за 2022 година упатуваат на забавување на растот, во најголем дел поради остварувањата во првиот квартал под влијание на енергетската криза и започнувањето на воениот конфликт во Украина, но и неоснованите шпекулации за стабилноста на денарот и на банкарскиот систем.
„Оттука, се очекува дека годишниот раст на депозитите на крајот на 2022 година ќе изнесува 5 отсто, по што со стабилизација на тековите, за 2023 година се очекува забрзување на стапката на раст на 7,3 отсто и натамошен тренд на забрзан раст, при проектирана стапка на годишен раст од 7,7 отсто во 2024 година“,укажуваат од Народната банка.
.webp){kind=icon}
