Народната банка бележи раст на депозитите и на кредитите

Вкупните депозити во октомври, годинава бележат месечен раст од 0,4 проценти, којшто во услови на пад на депозитите на корпоративниот сектор во целост се должи на растот на депозитите на секторот „домаќинства“, соопшти Народната банка. На годишна основа, вкупните депозити се зголемени за 4,3 проценти, во поголем дел како резултат на растот на депозитите на „домаќинствата“.

Од друга страна, вкупните кредити истиот месец имаат месечен раст од 0,8 проценти, при годишен раст од 10,1 проценти.

„Притоа, зголемувањето на месечно и на годишно ниво се должи на зголеменото кредитирање на двата сектора, со поизразен придонес на корпоративниот сектор“, информираат од Народната банка.

Во октомври, вкупните депозити на корпоративниот сектор се намалени за 0,4 проценти на месечна основа.

„Месечниот пад во поголем дел се должи на намалените краткорочни депозити во странска валута, при забележан пад и на депозитните пари и долгорочните депозити во денари, додека останатите компоненти бележат раст. Анализирано на годишна основа, овие депозити забележаа раст од 1,5 проценти, којшто пред сѐ е резултат на повисоките депозитни пари, при забележан помал раст и на краткорочните депозити во денари и во странска валута, а во услови на пад на долгорочните депозити во странска валута и во денари“, велат од Народната банка. 

Кредитите на корпоративниот сектор во октомври бележат раст за еден процент на месечна основа, при годишен раст од 12,9 проценти.

„Нагорната месечна и годишна промена е резултат на растот на кредитирањето во денари и во странска валута, којшто е поизразен кај кредитите во странска валута“, објаснуваат од Народната банка.

Во октомври, депозитите на домаќинствата, се повисоки за 0,3 проценти на месечна основа, како резултат на растот на долгорочните депозити во странска валута, депозитните пари и долгорочните депозити во денари, додека краткорочните депозити во странска валута и во денари бележат пад.

„Во споредба со истиот период претходната година, депозитите на домаќинствата се зголемени за 5,6 проценти, пред сѐ поради растот на краткорочните депозити во странска валута, при дополнителен позитивен придонес и на депозитните пари и долгорочните депозити во странска валута, додека долгорочните и краткорочните депозити во денари се намалени“, информира НБМ.

Кај кредитите на домаќинствата, овој месец, е забележан месечен раст од 0,5 проценти, којшто во поголем дел произлегува од зголеменото кредитирање во странска валута.

„Споредено на годишно ниво, кредитите на домаќинствата се повисоки за 7,5 проценти, во услови на раст на кредитите во денари и во странска валута, со поголем придонес на кредитите во странска валута“, велат од централната банка.

Во октомври, анализирано според намената на кредитите одобрени на физичките лица, најзастапените категории ‒ потрошувачките и станбените кредити, бележат месечен раст од 0,5 и 1,1 проценти, соодветно, при годишен раст од 6,7 и 13 проценти, соодветно.

Автомобилските кредити се зголемени на месечно и годишно ниво за 2,9 и 2,3 проценти, соодветно, додека кредитите одобрени на кредитни картички бележат месечен и годишен раст од 0,5 и 0,9 проценти, соодветно.

„Во октомври, кај негативните салда на тековните сметки е забележан минимален месечен пад од 0,1 проценти, при годишен пад од 1,6 проценти, додека кредитите одобрени врз други основи се намалени за 1,1 и 17 проценти на месечно и на годишно ниво, соодветно“, велат од Народната банка.