КХВ одобри Општина Аеродром да издаде обврзници од 5,3 милиони евра

Комисијата за хартии од вредност на последната седница донесе решение со кое на Општина Аеродром ѝ одобри издавање долгорочни должнички хартии од вредност по пат на јавна понуда. Станува збор за прва емисија на општински обврзници во количество од 11.000 лота, во апоени од 30.000 денари по лот по обврзница.

„Вкупната номинална вредност на емисијата е 330.000.000 денари (5,3 милиони евра). Рокот на достасување на издадените обврзници е 10 години од денот на регистрирањето на обврзниците во Централниот депозитар. Општинските обврзници се со фиксна годишна каматна стапка во износ од 5 проценти. Првата исплата на каматата ќе започне по истекот на 12 месеци од денот на нивното регистрирање, а ќе заврши во наредните 10 години, исто така сметано од денот на регистрирањето на обврзницата. Главницата ќе се исплаќа во девет еднакви рати, започнувајќи од втората година од регистрирањето на обврзницата“, информираат од КХВ.

Оттаму додаваат дека понудата се смета за успешна доколку се запишат и уплатат најмалку 60 проценти од понудените обврзници. Емисијата се врши заради собирање средства за финансирање на проектот „Заеднички активности за локален економски развој“, кој опфаќа повеќе инфраструктурни и капитални проекти на Општината.

„КХВ ја одобри оваа емисија откако Општина Аеродром доби согласност од  Министерството за финансии за нејзино задолжување и ги исполни законски утврдените услови за издавање општински обврзници. Постапката на запишување и уплата на понудените општински обврзници ќе започне откако ќе стапи во сила Одлуката на Владата на Република Северна Македонија со која се одобрува максималниот износ на новото задолжување на издавачот“, велат од КХВ.

Ова е втор обид една македонска општина да се задолжи преку издавање обврзници. Неодамна и Општина Штип се обиде да издаде обврзница, но обидот пропадна откако Владата не даде зелено светло за новото задолжување.