.webp){kind=icon}
Вредноста на акциите на италијанските банки падна во вторникот, по ненадејната најава за нов данок на добивка, со што беа збришани речиси десет милијарди евра од нивната заедничка пазарна вредност.
Италијанскиот берзански индекс FTSE MIB првично потона за 2,2 отсто, по што делумно закрепна, додека цените на акциите на „Уникредит“ (UniCredit) и „Интеса Санпаоло“ (Intesa Sanpaolo) се лизнаа по најмалку пет отсто. Новиот данок го потисна и паневропскиот индекс Stoxx 600, кој на почетокот на тргувањето ослабе за 0,1 отсто.
Прочитајте повеќе: Италија воведува данок за екстра-профит на банките
Новата давачка е дел од големиот пакет владини мерки што опфаќаат сè, од лиценци за такси-превоз до странски инвестиции. Данокот може да ѝ донесе повеќе од две милијарди евра на државата, пишува агенцијата „Анса“ (Ansa). Врвот на италијанската влада се согласи за „повлекување на 40 отсто од дополнителниот профит на банките од повеќе милијарди долари“ во 2023 година, со што ќе се финансираат даночни намалувања од друга страна и станбени кредити за оние што купуваат недвижен имот за првпат“, рече вицепремиерот Матео Салвини на прес-конференција во Рим.
„Данокот е крајно негативен за банките, имајќи го предвид неговото влијание врз капиталот и заработката“, напиша тим на аналитичари на „Ситигруп“ (Citigroup) во белешката до инвеститорите. „Новата симулација на влијанието врз резултатите покажува посилно влијание во споредба со симулацијата што ја спроведовме во април“, додаваат тие.
Акциите на италијанските банки пораснаа благодарение на високите каматни стапки | Bloomberg
Аналитичарите пресметаа дека новиот данок одговара на износ од околу 19 отсто од нето-заработката на банките во 2023 година, односно приближно три отсто од нивната сметководствена вредност и околу 0,5 отсто од пондерираната актива за оваа година.
Аналитичарите од „Блумберг интелиџенс“ проценуваат дека нето-добивката на италијанските банки оваа година би можела да се намали за околу десет проценти.
„Акциите на финансискиот сектор сочинуваат околу 30 отсто од италијанскиот пазар, поради што е почувствителен на новодонесениот данок“, рече Леонардо Пеландини, берзански стратег во банката „Јулиус Баер“ (Julius Baer). „Банките досега имаа многу добра година, особено ако се земе предвид скокот на нето-каматните маржи поради повисоките каматни стапки, што значи дека е време за здрава консолидација“.
Италијанските даночни намери се нова пречка за европските акции, кои минатата недела по долго време беа обележени со висока нестабилност предизвикана од шпекулациите за натамошно зголемување на каматните стапки и нивното потенцијално влијание врз економскиот раст. Податоците објавени во вторникот покажаа дека надворешната трговија на Кина падна повеќе од очекуваното, што му зададе нов удар на економското закрепнување.
