Значителен раст на каматите на кредитите од македонските банки

Во јули 2023 година, просечната каматна стапка на вкупните кредити изнесува 5,49 проценти, што претставува месечен и годишен раст од 0,37 п.п. и 1,16 п.п., соодветно, соопшти Народната банка. Просечната каматна стапка на вкупните депозити изнесува 1,50 проценти и е зголемена за 0,10 п.п. на месечна основа, при годишен раст од 0,83 п.п. 

Просечната каматна стапка на новоодобрените кредити во јули забележа месечен и годишен раст од 0,31 п.п. и 1,56 п.п., соодветно и изнесува 5,57 проценти. Просечната каматна стапка на новопримените депозити изнесува 2,21 проценти и е намалена за 0,49 п.п. на месечна основа, додека на годишна основа бележи зголемување за 1,37 п.п.

Зголемени каматите на кредитите за корпоративниот сектор

Во јули, просечната каматна стапка на вкупните кредити на корпоративниот сектор е зголемена за 0,50 п.п. на месечна основа и изнесува 5,36 проценти. 

„Нагорната промена е резултат на растот кај сите компоненти: каматните стапки на денарските кредити со валутна клаузула (за 0,87 п.п.), каматните стапки на кредитите во странска валута (за 0,55 п.п.) и каматните стапки на денарските кредити без валутна клаузула (за 0,38 п.п.). На годишна основа, каматната стапка на вкупните кредити на корпоративниот сектор бележи раст од 1,83 п.п“, информираат од Народната банка.

Овој месец, кај каматната стапка на новоодобрените кредити на корпоративниот сектор е забележан месечен раст од 0,49 п.п. и изнесува 5,75 проценти.

„Од аспект на валутната структура, месечниот раст е резултат на зголемените каматни стапки на денарските кредити со и без валутна клаузула (за 1,69 п.п. и 0,39 п.п., соодветно), додека каматните стапки на кредитите во странска валута се намалени (за 0,15 п.п.). Споредено на годишно ниво, оваа каматна стапка е повисока за 2,18 п.п.“, велат од централната банка.

Просечната каматна стапка на вкупните депозити на корпоративниот сектор, во јули, изнесува 2,02 проценти и е повисока за 0,03 п.п. на месечно ниво. Притоа, промената се должи на растот на каматните стапки на денарските депозити без и со валутна клаузула (за 0,06 п.п. и 0,01 п.п., соодветно), додека каматните стапки на депозитите во странска валута остварија пад (за 0,11 п.п.).  

„Во споредба со јули претходната година, каматната стапка на вкупните депозити на корпоративниот сектор е зголемена за 1,08 п.п.“, велат од НБМ. 

Овој месец, каматната стапка на новопримените депозити на корпоративниот сектор е намалена за 0,54 п.п. и изнесува 1,57 проценти. Месечната промена се должи на пониските каматни стапки на денарските депозити без валутна клаузула и депозитите во странска валута (за 0,52 п.п. и 0,44 п.п., соодветно). Истовремено, каматната стапка на денарските депозити со валутна клаузула изнесува 1,90 проценти, за разлика од претходниот месец кога банките и штедилниците не примиле депозити од овој вид. На годишна основа, оваа каматна стапка бележи раст од 0,92 п.п. 

Како се движат каматите на кредитите за населението?

Во јули 2023 година, каматната стапка на вкупните кредити на домаќинствата изнесува 5,61 проценти и забележа месечен раст од 0,26 п.п. Месечниот раст се должи на зголемувањето на сите компоненти: каматните стапки на денарските кредити без и со валутна клаузула (за 0,32 п.п. и 0,20 п.п., соодветно) и каматните стапки на кредитите во странска валута (за 0,18 п.п.). На годишна основа, каматната стапка на вкупните кредити на домаќинствата оствари раст од 0,53 п.п. 

Просечната каматна стапка на новоодобрените кредити на домаќинствата, во јули, изнесува 5,32 проценти и оствари месечен раст од 0,05 п.п. Анализирано по валута, месечната промена во целост произлегува од растот на каматните стапки на денарските кредити без валутна клаузула (за 0,04 п.п.), во услови кога каматните стапки на кредитите во странска валута и денарските кредити со валутна клаузула бележат пад (за 0,35 п.п. и 0,17 п.п., соодветно). На годишна основа, оваа каматна стапка е повисока за 0,73 п.п.

Во јули, каматната стапка на вкупните депозити на домаќинствата се зголеми за 0,10 п.п. и изнесува 1,44 проценти. 

„Притоа, промената произлегува од растот кај сите компоненти на оваа каматна стапка, и тоа: каматните стапки на депозитите во странска валута (за 0,11 п.п.), како и каматните стапки на денарските депозити без и со валутна клаузула (за 0,10 п.п. и 0,07 п.п., соодветно)“, информира Народната банка.

Во споредба со истиот период претходната година, каматната стапка на вкупните депозити на домаќинствата бележи раст од 0,79 п.п.

Каматната стапка на новопримените депозити на домаќинствата, овој месец, е намалена за 0,47 п.п. на месечно ниво и изнесува 2,40 проценти. 

„Надолната промена е резултат на падот на каматните стапки на денарските депозити без валутна клаузула (за 0,51 п.п.) и каматните стапки на депозитите во странска валута (за 0,12 п.п.). Во јули, банките и штедилниците не евидентирале новопримени денарски депозити со валутна клаузула. Анализирано на годишно ниво, оваа каматна стапка забележа зголемување за 1,48 п.п.“, соопшти централната банка