Народната банка бележи раст на кредитите и на депозитите

Вкупните депозити во јануари годинава се непроменети на месечна основа, а на годишна основа се зголемени за 10 проценти, како резултат на растот на депозитите на двата сектора, со поголем придонес на депозитите на секторот „домаќинства“, соопшти Народната банка.

Оттаму додаваат дека во јануари, вкупните кредити се намалени за 0,2 проценти, во споредба со претходниот месец, во целост поради падот на кредитирањето на корпоративниот сектор. Истовремено, вкупните кредити бележат годишен раст од 5,7 проценти, којшто се должи на повисоките кредити на двата сектора, со поизразен придонес на секторот „домаќинства“.

Во јануари 2024 година, вкупните депозити на корпоративниот сектор се намалени за 1,8 проценти на месечно ниво. 

„Месечниот пад во поголем дел се должи на намалените депозитни пари, при дополнителен пад и на краткорочните депозити, додека долгорочните депозити бележат раст. На годишна основа, овие депозити се повисоки за 15,9 проценти, во поголем дел поради растот на депозитните пари и краткорочните депозити во странска валута, при остварен дополнителен раст и кај останатите компоненти.“, објаснуваат од Народната банка.

Кај кредитите на корпоративниот сектор овој месец е забележан пад од 0,7 проценти, како резултат на намаленото кредитирање во денари и во странска валута, поизразено кај кредитите одобрени во денари.

„Во споредба со јануари претходната година, кредитите на корпоративниот сектор се зголемени за 4,3 проценти, во целост поради растот на кредитирањето во денари“, велат од Народната банка.

Во јануари, вкупните депозити на домаќинствата се незначително намалени за 0,1 процент, во целост како резултат на падот на депозитните пари, додека останатите компоненти забележаа раст.

„Годишниот раст изнесува 7,8 проценти и произлегува од повисоките долгорочни депозити во странска валута и во денари и депозитните пари, додека краткорочните депозити во странска валута и во денари остварија пад“, информираат од Народната банка.

Кредитите на домаќинствата, во јануари бележат месечен раст од 0,3 проценти, којшто во поголем дел се должи на повисоките кредити во денари, при раст и на кредитите во странска валута.

„На годишна основа, растот изнесува 6,9 проценти како резултат на зголемено кредитирање во денари и во странска валута, со поголем придонес на кредитите во странска валута“, велат од Народната банка.

Анализирано според намената на кредитите одобрени на физичките лица, во јануари, кај потрошувачките кредити, како најзастапена категорија, е забележан месечен пад од 1,1 проценти, при годишен раст од 5,9 проценти. Станбените кредити се зголемени за 0,3 проценти и 10,5 проценти на месечна и на годишна основа, соодветно.

„Овој месец, автомобилските кредити остварија месечен и годишен раст од 0,3 и 12,6 проценти, соодветно, додека кредитите одобрени на кредитни картички се пониски за 1,3 проценти и 5,1 проценти на месечно и на годишно ниво, соодветно. Во јануари, негативните салда на тековните сметки остварија раст за 11,6 проценти и 3,3 проценти на месечна и на годишна основа. Кај кредитите одобрени врз други основи е забележано месечно и годишно намалување од 3,1 и 20,9 проценти, соодветно.“, велат од Народната банка.