Се топат заштедите на фирмите

Вкупните кредити во април бележат раст од 6,8 проценти на годишно ниво, а вкупните депозити од 9,3 проценти, соопшти Народната банка.

„Зголемувањето и кај кредитите и кај депозитите се должи на зголеменото кредитирање и кај домаќинствата и кај корпоративниот сектор, но поизразен е кај домаќинствата“, се наведува во соопштението.

Депозити

На месечно ниво, вкупните депозити бележат месечен раст од 1,3 отсто. Овој раст целосно се должи на домаќинствата во услови кога депозитите на корпоративниот сектор се намалуваат.

„Вкупните депозити на корпоративниот сектор во април бележат намалување од 1,3 отсто, споредено на месечна основа. Надолната промена во најголем дел е резултат на падот на краткорочните депозити во странска валута и депозитните пари, а во помал дел и на краткорочните депозити во денари, во услови на раст на долгорочните депозити. Годишниот раст изнесува 8,0 отсто и во поголем дел се должи на зголемувањето на депозитните пари и долгорочните и краткорочните депозити во денари, при дополнителен позитивен придонес и на краткорочните и долгорочните депозити во странска валута“, соопшти НБРМ.

Вкупните депозити на домаќинствата овој месец се зголемени за 2,7 отсто на месечно ниво. Анализирано на годишна основа, растот изнесува 10,8 отсто.

 

Кредити

Во април вкупните кредити остварија месечно зголемување од 1,2 отсто, кое се должи на повисоките кредити на двата сектора, со поголем придонес на корпоративниот сектор.

„Во април кредитите на корпоративниот сектор остварија месечно зголемување од 2,0 отсто и се должи на зголеменото кредитирање во денари и во странска валута, со поголем придонес на кредитите во денари. Споредено на годишна основа, растот од 6,6 отсто во целост произлегува од зголемените кредити во денари, во услови на пад на кредитите во странска валута“, наведува НБРМ.

Минатиот месец кредитите на домаќинствата забележаа месечно и годишно зголемување од 0,5 отсто и 7,0 отсто, соодветно.

Најголем раст има кај автомобилските кредити

Гледано според намената на кредитите одобрени на физичките лица, кај потрошувачките и станбените кредити, како најзастапени, остварен е месечен раст од 1,0 отсто соодветно, а годишното зголемување изнесува 6,3 отсто и 10,9 отсто, соодветно. Кај автомобилските кредити, во април, е забележано зголемување од 1,5 отсто на месечно и 17,1 отсто на годишно ниво.

Кај кредитните картични и кај негативните салда на тековните сметки е забележан годишен пад од 7,5 отсто и 6,3 отсто, соодветно.