.webp){kind=icon}
Македонскиот банкарски систем лани остварил добивка од работењето во износ од 9,1 милијарди денари, којашто во споредба со претходната година е поголема за 26,2 проценти, или за 1,8 милијарди денари, покажуваат новите податоци на Народната банка.
„Најголем придонес за растот на добивката имаа приходите од наплатени претходно отпишани побарувања коишто се поголеми за 1,7 милијарди денари, или за повеќе од двојно, во споредба со 2020 година. Значителен придонес имаа и нето-приходите од провизии (коишто се зголемија за 750 милиони денари, или за 15,5 проценти), намалените трошоци за исправка на вредноста (за 683 милиони денари), како и поголемите нето каматните приходи (за 586 милиони денари, или за 3,9 проценти). Капиталните добивки од продажба на преземени средства се помали за 971 милион денари, додека оперативните трошоци се зголемија за 890 милиони денари“, се вели во анализата на Народната банка.
Во Република Северна Македонија работат петнаесет депозитни институции, односно тринаесет банки и две штедилници. Во однос на претходната година, бројот на банките се намали за една, а бројот на штедилниците остана ист.
