Не го сакате Илон Маск во вашите акции? Волстрит има ЕТФ за вас

За секој инвеститор кој сака повеќе од компаниите на Илон Маск во своето портфолио, Волстрит има сѐ повеќе ЕТФ-и да понуди. Сега се планира нешто за инвеститорите кои сакаат помалку „да го гледаат“ ексцентричниот милијардер.

Компанијата „Субверзив“ (Subversive ETFs)  поднесе документи за лансирање на два фонда кои се тргуваат на берза,  (ЕТФ-ови), кои би ги следеле Nasdaq 100 и S&P 500, а би ги исклучувале компаниите основани, контролирани или предводени од најбогатиот човек во светот. Предложените производи - со тикери QQNE и SPNE - се најновиот знак за тоа колку брзо индустријата на ЕТФ-ови ја сече широката пазарна изложеност во сè поспецифични инвестициски погледи.

Поднесоците се резултат на повеќегодишна трка да се спакува речиси секое мислење за Маск во производ што може да се тргува. Инвеститорите веќе можат да купуваат левериџ фондови кои ги зголемуваат добивките или загубите во „Тесла“, новолансирани левериџ фондови поврзани со „Спејс екс“ и, до неодамна, дури го имаа како опција и  „Илон ЕТФ“ (ELON ETF), кој ја спои долгата позиција во „Тесла“ со краток облог против „Форд“. Најновите понуди би им овозможиле на инвеститорите да поседуваат речиси цел бенчмарк, додека изразуваат специфичен став за една личност. Всушност, тие го претвораат пасивниот индексен фонд во активно мислење за една личност.

Она што започна како бизнис изграден околу инвестирање во индекси со ниски трошоци, сè повеќе се развива во бизнис изграден околу персонализација. Со експлозијата на побарувачката за „ниша“ производи, издавачите брзаа да создадат фондови кои не само што ги следат пазарите, туку изразуваат сè поспецифични убедувања за поединечни компании, раководители и инвестициски теми.

„Илон Маск е многу поларизирачка фигура, па затоа има смисла што издавачот на ЕТФ може да се обиде да профитира од ова“, рече Нејт Герачи, претседател на „НоваДиус Велт Менаџмент“ (NovaDius Wealth Management). „Сепак, ако сега сме во свет на ЕТФ-ови каде што издавачите исклучуваат поединечни компании од главните индекси врз основа на расположението на инвеститорите кон еден човек, можеби ги сечеме работите малку претенко.“ 

Victor J. Blue/Bloomberg

 

Производите, исто така, го следат неодамнешното додавање на „Спејс екс“ на Nasdaq 100, по неговото претходно вклучување во индексите FTSE Russell и MSCI, откако мноштво добавувачи ги изменија своите правила за вклучување во индексот за да обезбедат побрз влез за мега ИПО-а. Овие додавања предизвикаа милијарди долари вредно пасивно купување и ги сместија акциите во милиони портфолија за следење на индексот - пресвртница што ја прославија некои инвеститори, но ја критикуваа други.

Скептиците тврдат дека потегот ги принудува пасивните инвеститори да купуваат во некои од највредните компании на пазарот пред целосно да се одвива нормалниот процес на откривање на цените.

Дејв Надиг, претседател и директор за истражување на „ЕТФ.ком“ (ETF.com), рече дека фондовите изградени околу многу специфични инвестициски погледи честопати можат да се мачат да развијат трајна публика.

„Тие можеби ќе привлечат пари од луѓе што не размислуваат премногу, но овие видови тесно-формирани, микро-идеи не се баш ‘за’ секого“, рече тој за новото поднесување. „Забавен маркетинг, а не вистинска инвестициска теза.“

Новите понуди исто така доаѓаат по рекордниот месец јуни во кој беа лансирани околу 214 ЕТФ-ови, според податоците собрани од Ерик Балчунас од  „Блумберг Интелиџенс“, најмногу во историјата. Целиот универзум на ЕТФ-ови привлече околу 191 милијарда долари во текот на месецот, втор најдобар месечен прилив досега, со над 2.700 фондови кои привлекоа прилив. Обемот на тргување, исто така, се приближи до речиси рекордно високо ниво, достигнувајќи околу 7 билиони долари.

Издавачот на овие нови фондови се надева дека некои инвеститори ќе ги сметаат компаниите поврзани со Маск како компании со „потенцијални слабости во корпоративното управување, политички ризици и зголемена нестабилност на цените на акциите“, според проспектот поднесен во средата.

„Разбирам зошто издавачите се чувствуваат принудени да смислат нови начини да се истакнат“, рече Џефри Птак од „Морнингстар“ (Morningstar). „Инвеститорите сè уште треба да бидат претпазливи, бидејќи производот можеби нема да служи за легитимна инвестициска цел или ќе чини многу пари за многу маргинална корист.“