Нови кредити и грантови за домаќинствата за проекти за енергетска ефикасност

Нова кредитна линија во вкупна вредност од четири милиони евра и поврат на дел од средствата е новата поволност ставена на располагање за граѓаните во земјава за поддршка на проекти за енергетска ефикасност. Кредитите се наменски за инвестиции за енергетска ефикасност за домаќинствата, станбените заедници, производителите и давателите на услуги. Парите се обезбедени преку Европската банка за обнова и развој (ЕБОР), а ќе бидат пласирани преку „НЛБ банка“.

Дополнително, корисниците ќе може да добијат и поврат на инвестираните средства во висина до 20 отсто, а за таа намена средствата се обезбедени од Европската Унија (ЕУ) и од Јапонија.

,,Овој кредит ќе ја овозможи транзицијата кон зелена енергија преку финансирање на надградбите на енергетска ефикасност во станбените згради, кои се најголеми потрошувачи на енергија во земјата“, изјави Метео Колангели, регионален директор на ЕБОР за Западен Балкан, потенцирајќи дека ваквите иницијативи во соработка со локалните финансиски институции ги зајакнуваат локалните финансиски екосистеми и обезбедуваат услови финансирањето да стигне до населението на поефикасен начин.

„Овој проект не само што промовира зелена и одржлива иднина на С. Македонија туку им носи и директни бенефиции на граѓаните, преку намалување на сметките за електрична енергија и подобрување на животите на сопствениците на домовите“, изјави Колангели.

Оваа кредитна линија ќе ги поддржи високите перформанси на зелените технологии, материјалите и решенијата за станбените објекти и згради во приватна сопственост. Инвестициите во опрема што заштедува енергија, како што се изолацијата, прозорците, топлотните пумпи и соларните панели, ќе ги намалат емисиите на стакленички гасови, ќе ги намалат трошоците за енергија и ќе го подобрат квалитетот на живеење на станарите. Исто така, ќе помогнат во справување со високата потрошувачка на енергија и емисиите на јаглерод на станбениот сектор во земјата.

„Среќни сме што ја продолжуваме соработката со ЕБОР и што партнерски го унапредуваме зеленото кредитирање, овозможувајќи им полесен пристап на домаќинствата до поволни средства за финансирање проекти што придонесуваат за енергетска ефикасност и заштита на животната средина, а кои пак се значаен столб на нашата политика за одговорно кредитирање. Оваа соработка ја нагласува нашата заедничка визија за одржлива иднина и поттикнување на зелената транзиција во финансискиот сектор“, изјави Тони Стојановски, главен извршен директор и претседател на УО на „НЛБ банка“ Скопје.

Преку програмата за финансирање на зелената економија за Западен Балкан на ЕБОР (EBRD’s Western Balkans Green Economy Financing Facility - GEFF), која беше промовирана во 2017 година, за помалку од седум години над 18.000 домаќинства од Западен Балкан инвестираа вкупно над 100 милиони евра во мерки за заштеда на енергијата, како изолација, топлотни пумпи, нови прозорци и соларни панели. 
Оваа програма е поддржана од ЕУ преку Заедничкиот европски фонд за Западен Балкан (European Western Balkans Joint Fund - EWBJF) преку инвестициската рамка за Западен Балкан, а како дел од програмата за регионална енергетска ефикасност, како и билатералната донаторска поддршка.

ЕБОР е главниот институционален инвеститор во земјава и до денес инвестирала над 2,9 милијарди евра во 196 проекти.