Кога вработените можат да ја намалат својата традиционална петдневна работна недела на четири дена, тие имаат тенденција да го распределат новото слободно време на една изненадувачка активност: спиење.
Работниците кои преминале на 32-часовна работна недела, спиеле 7,58 часа навечер, речиси цел час повеќе отколку кога работеле 40 часа неделно, вели предводничката на студијата Џулиет Шор, социолог и економист на Бостонскиот колеџ, која следи повеќе од 180 организации ширум светот во нивната транзиција кон скратено работно време преку шестмесечни пилот програми.
Со други зборови, тие минувале речиси седум од нивните осум слободни часови неделно дремејќи, наместо да извршуваат некои работи или да се дружат со семејството и пријателите.
„Не бев изненадена што луѓето спијат малку повеќе, но бев изненадена од тоа колку се силни промените“, нагласува Шор. Процентот на лица без сон кои спијат помалку од седум часа навечер, при четиридневен работен распоред паднал од 42,6 отсто на 14,5 отсто.
Шор спровела истражување на 304 работници во 16 компании (три со седиште во САД, една во Австралија и 12 со седиште во Ирска) што го следела преку глобални, шестмесечни испитувања спроведени од непрофитната организација 4 Day Week Global. Истражувањето доаѓа откако пандемијата ги поттикна работниците и работодавачите низ индустриите повторно да размислат како, каде и кога се работи.
Концептот на скратена работна недела стана сè попопуларен откако пандемијата го промени распоредот и ги отвори очите на многу работници за придобивките од флексибилноста во подобрувањето на нивниот живот. Дури и кога некои шефови, од Илон Маск од Tesla до Џејми Дајмон од JPMorgan Chase & Co, се залагаат за враќање на вработените на распоредот пред пандемијата, други поддржуваат пократки работни недели. Играчот на Tampa Bay Buccaneers, Том Брејди, како и Адам Арон, извршен директор на AMC Entertainment Holdings, неодамна зборуваа за поголема рамнотежа помеѓу работата и приватниот животот.
Bloomberg
Не сите организации ги завршуваат овие четиридневни проби. Околу еден од пет работодавци се откажуваат, повеќето во фазата на планирање. Раководните лица кои го спроведуваат пилотот велат дека се соочуваат со двоен предизвик за надминување на петдневните норми за персоналот и индустријата односно дека се обидуваат да ја отстранат непотребната работа за да се постигне истиот ефект за четири дена.
За оние кои го прават тоа, огромната добивка во форма на сон може да изгледа контраинтуитивно. Зошто вработените кои земаат слободен петок спијат уште еден час секоја вечер наместо да уживаат во хоби или дружење.
Кристофер Барнс, професор по менаџмент на бизнис школата Michael G. Foster при Универзитетот во Вашингтон, тврди дека четиридневните распореди ги намалуваат ограничувањата на целокупното време, намалувајќи ја потребата за испраќање електронска пошта или диплење алишта во 22 часот.
„Луѓето не се само работници и спијачи. Ние сме и членови на семејството и сопружници, членови на заедницата и родители, па ако не одвоиме време за секоја од тие улоги, работите се натрупуваат“, смета Барнс.
И други истражувања покажуваат врска помеѓу спиењето и работното време, особено на работните места со долги работни часови. „Спиењето и работата меѓусебно се натпреваруваат“, вели Барнс, „но кога го менувате спиењето за работа, тоа е проблематично. Го жртвувате вашето здравје и имате слаби перформанси на работа“. Последиците од лошиот сон вклучуваат неетичко однесување, помал работен ангажман, помала помош за колегите и повеќе навредливи и агресивни тенденции кон лидерството, објаснува тој.
Прелиминарните податоци од истражувањето спроведено од Шор покажуваат дека работниците на четириднен распоред забележале подобрувања во различните мерки на благосостојба и продуктивност, како што се задоволството од животот и рамнотежата меѓу работата и семејството, и таа додава дека овие резултати би можеле да бидат поврзани со дополнителното време поминато во спиење.
.webp){kind=icon}
