Повеќе од една третина од масите во канцелариите ширум светот се празни во текот на целата недела, според нов извештај, што покренува прашања за тоа колку добро се осмислени работните простории додека компаниите се борат да ги вратат вработените во нив.
Извештајот, од австралиската агенција XY Sense, покажа дека 36 отсто од таканаречените работни пунктови - кабини и бироа - никогаш не се зафатени, што „индицира прекумерна застапеност“. Од оние што се користат, 29 отсто биле користени на три часа или помалку во текот на денот. Само 14 отсто биле зафатени пет или повеќе часа, според студијата која следела 24.855 работни простории во девет региони, вклучувајќи ги САД, Велика Британија, Хонгконг и Сингапур. Меѓу местата што најмногу се користат се салите за состаноци за две или три лица, кои во просек се поплнети 90 отсто. Генерално, користењето на канцелариите е „заглавено“ на околу 50 отсто од нивоата пред пандемијата.
Наодите ги илустрираат предизвиците со кои се соочуваат организациите додека ги проценуваат потребите за канцелариски простор. Работниците и менаџерите се согласни дрека треба да се биде на самото работно место барем една третина од времето, според истражувањето на „Бостон консатинг груп“ (Boston Consulting Group), но голем дел од тоа време вработените веќе не го трошат „врзани за биро“.
Просториите за мали, изолирани средби, како и за поотворена соработка и кабините со звучна изолација за индивидуална работа денес се порелевантни во споредба со старомодните кабини (во форма на коцка). Сепак, 80 отсто од вкупната површина на подот зафаќаат поединечните работни пунктови, а само 20 отсто од површината е наменета за соработка, откри истражувањето на XY Sense.
„Време е да се преиспита релевантноста на обичното биро“, вели Алекс Бирч, ко-основач и главен извршен директор на XY Sense. „Овие работни маси доминираат со просторот во нашите канцеларии, тие се скапи, а едноставно не ги користиме како пред пандемијата. На компаниите им требаат помалку од нив сега кога луѓето најголемиот дел од работата го вршат дома. Компаниите треба или повторно да го организираат тој простор за подобро искуство на работното место или да ги вложат заштедите, но не можат да ја игнорираат пренатрупаноста што се случува“.
Depositphotos
И други податоци го поткрепуваат оддалечувањето од бироата. Истражување на производителот на канцелариски мебел „Хаворт“ (Haworth) покажа дека 85 отсто од вработените имале свои индивидуални работни станици пред 2020 година, но сега имаат помалку од половина. По годините кога компаниите едноставно трупаа што повеќе вработени во статични кабини или долги редови на работни пунктови, некои сметаат дека промените предизвикани од работата од далечина требало да се случат многу порано.
„Предолго ги дизајниравме канцелариите како да сме растенија во саксии“, вели Кеј Сарџент, директорка за практики на работното место во фирмата за архитектура и дизајн ХОК (HOK). „Дали навистина ги викате луѓето да се вратат во канцеларија за да седат зад маса цел ден? Или сакате да ги поттикнете да се поврзат, да менторираат и да иновираат?“
Слабата искористеност на работните маси, исто така, може да ги поттикне работодавците да ги преиспитаат своите потреби за недвижнини. Девет од десет големи организации пријавија ниски стапки на користење на канцелариите во истражувањето на ЦБРЕ (CBRE), а повеќе од половина очекуваат да го намалат користењето на просториите во текот на следните три години. Според податоците на XY Sense, користењето на канцелариите не се променило многу меѓу првиот и вториот квартал на 2023 година. Сепак, околу еден милион американски канцелариски работници сè почесто се соочуваат со повици да се вратат на работното место до крајот на годината, според брокерската куќа ЏЛЛ (JLL).
.webp){kind=icon}
