Директорите ги водат компаниите оддалеку иако работниците се враќаат во канцелариите

Примарен дом на „Старбакс“ (Starbucks Corp.) е Сиетл. Сепак, нејзиниот штотуку поставен главен извршен директор не живее во истиот град, па дури ниту во истата држава каде што се наоѓа седиштето на компанијата - тренд што се појавува меѓу врвните лидери кои живеат на оддалеченост за која е потребно авионско патување во време кога многу вработени се соочуваат со се‘ помала флексибилност во однос на работењето од далечина.

Оваа недела „Викторија сикрет“ (Victoria’s Secret & Co.), која има седиште во Колумбус, Охајо, именуваше нов извршен директор кој ќе биде во Њујорк. Од Брајан Никол, новиот извршен директор на „Старбакс“ нема да се бара да се пресели во Сиетл, каде што е седиштето на компанијата, иако тој ќе поминува голем дел од своето време таму. Тој, исто така, добива оддалечена канцеларија во Њупорт Бич, Калифорнија, каде што се наоѓа неговиот поранешен работодавец „Чипотл Мексикан Грил“ (Chipotle Mexican Grill Inc). Хилари Супер, која беше „украдена“ од брендот за долна облека на Ријана за да биде следната лидерка во „Викторија сикрет“ ќе се пресели од Калифорнија да живее во Њујорк.

И двајцата директори се согласија да патуваат често за нивната улога. „Старбакс“ ќе му дозволи на Никол да го користи корпоративниот авион, а „Викторија сикрет“ ќе ги покрие патните трошоци на Супер.

Тие се приклучуваат на растечкиот број на корпоративни лидери на кои им се дава можност да ги водат своите бизниси од стотици или илјадници милји оддалеченост, барем во дел од времето. Тоа е дел од тековната еволуција на флексибилноста на работното место.

Од вработените во „Старбакс“, на пример, на почетокот на минатата година се бараше да се вратат во канцеларијата најмалку три дена во неделата, потег што предизвика бурни реакции кај некои работници. Никол, кој го пресели седиштето на „Чипотл“ од Денвер, не го следи преседанот во „Старбакс“. Претходниот извршен директор на синџирот кафулиња, Лаксман Нарасимхан, се пресели во Сиетл од Велика Британија. Никол ќе го помине поголемиот дел од своето време во седиштето на Сиетл, според портпаролот на „Старбакс“.

Некои од изборите за локација може да бидат од деловни причини. Кели Ортберг, кој стана извршен директор на „Боинг“ (Boeing Co) овој месец ќе работи во Сиетл, каде што може да го надгледува критичниот производствен центар 737 кој е подложен на голем притисок за подобрување на квалитетот по грешките кои за малку не предизвикаа катастрофа во лет претходно оваа година. Корпоративното седиште на „Боинг“ е во Арлингтон, Вирџинија.

Други аранжмани се прават за извршните директори да можат да работат од местото каде што веќе живеат. Скот Кирби од „Јунајтед ерлајнс“ (United Airlines Holdings Inc.) го дели своето време помеѓу неговата примарна резиденција во Далас и Чикаго, каде што се наоѓа неговата компанија.

Во „Викторија сикрет“, Супер не е првата и единствена извршна директорка која работи надвор од Охајо. Претседателот на брендот на компанијата и шефот на дизајнот живеат во Њујорк.

„Имаме централни канцеларии на многу локации, вклучувајќи го и Њујорк“, рече портпаролот на „Викторија сикрет“ во соопштението. „За нас, она што е најважно е нашите тимови да се чувствуваат поддржани без разлика каде се сместени“.

Претходникот на Супер, Мартин Вотерс, исто така беше со седиште во Њујорк и често ги посетуваше објектите во Охајо.