Од актерката Хали Бери, која извика „Јас сум во менопауза!“ од Капитол, до зголемувањето на владините средства во САД за истражување на здравјето на жените, табуто околу менопаузата почна да се намалува бидејќи сè повеќе жени зборуваат за своето искуство.
А таа зголемена свест - особено на работното место - се очекува значително да влијае на работната сила во САД, покажа нова студија.
Околу 70 отсто од жените од милениумската генерација рекле дека би размислиле за промена на своите работни аранжмани со намалување на часовите, преминување на работа со скратено работно време од полно работно време, промена на работата или предвремено пензионирање за да ги ублажат симптомите на менопауза, покажа анкета на „Керот фертилити“ (Carrot Fertility).
„Оваа генерација е многу гласна за своите предизвици на работното место или очекуваните предизвици на работното место и тие размислуваат однапред за тоа како менопаузата може да влијае на нивниот кариерен раст“, рече соосновачката на „Керот“ (Carrot), Асима Ахмад, во интервју.
Се проценува дека менопаузата ја чини економијата на САД 26,6 милијарди долари секоја година, вклучувајќи 1,8 милијарда долари поради изгубена продуктивност и милијарди повеќе за здравствени трошоци. Симптоми како топли бранови, заматеност во главата и проблеми со спиењето можат да ја нарушат способноста на една жена да ги заврши работите во канцеларија. Милениумците, најголемата генерација во работната сила, сè повеќе влегуваат во своите 40-ти години, кога симптомите на менопауза обично почнуваат да се појавуваат кај жените.
Околу 61 отсто од милениумките се загрижени за минување низ менопауза додека работат, а една третина рекле дека се загрижени дека тоа ќе му нанесе штета на нивниот кариерен раст, според „Керот“, кој обезбедува придобивки за градење семејство за работодавците.
„Керот“ анкетираше 1.000 жени милениумки (на возраст од 27 до 43 години) што сè уште не влегле во менопауза и 1.000 жени (на возраст од 44 до 59 години) што моментално се или неодамна биле во менопауза. Анкетата, објавена неодамна, беше спроведена во август и има маргина на грешка од 2 отсто.
Depositphotos
Просечната возраст за менопауза во САД е 51 година, според клиниката „Мејо“ (Mayo Clinic). Жените можат да се соочат со симптоми со години пред тоа, за време на периодот познат како перименопауза, кога нивото на женскиот хормон естроген почнува да се намалува.
„Ова ќе влијае на жените што се во нивните 40-ти, 50-ти и 60-ти години кога тие симптоми се многу активни, а можеби се на врвот на нивната кариера“, рече Ахмад, којa исто така е ендокринолог и специјалистка за неплодност. „Компаниите ќе изгубат повеќе на долг рок ако губат лидерство и се обидуваат да вработат повторно во тие ситуации“.
Причини поради кои не работат жените во Македонија
И додека во САД жените размислуваат за намалување на работниот ангажман поради оваа проблематика, во Македонија студија на „Фајнанс тинк“, институтот за економски истражувања и политики, покажа дека секоја втора работоспособна жена во Македонија е неактивна и не бара работа. Стапката на неактивност на жените на пазарот на трудот е висока (57,2 отсто).
Студијата идентификува четири клучни фактори за неактивноста на жените на пазарот на трудот. Првиот, родови стереотипи покажува дека вкоренетите општествени перцепции за родовите улоги и дискриминацијата врз основа на полот играат клучна улога во ограничувањето на учеството на жените во работната сила.
Вториот фактор ги опфаќа ставовите кон работата, при што позитивните ставови кон работата ги мотивираат жените да се вработат, додека негативните ставови и традиционалните одговорности за грижата за децата ги одвраќаат од активност на пазарот на трудот.
Третиот фактор се однесува на културните норми за грижата за децата, што покажува дека приоритетите поврзани со грижа силно влијаат врз учеството на жените на пазарот на трудот.
Четвртиот фактор е во поглед на домашните обврски, кои традиционално се перципираат како женски задачи, што дополнително ги ограничува нивното време и можности за вработување.
Depositphotos
Сепак, во зависност од возраста, овие фактори влијаат различно. За жените на возраст од 18 до 34 години, само негативните ставови кон работата значително предвидуваат неактивност, што укажува на тоа дека кај младите перцепциите за работата влијаат на нивната активност. За овие жени, родовите стереотипи и културните норми се помалку важни, што може да се смета за позитивна промена. Во групата од 35 до 49 години, негативните ставови продолжуваат да играат улога, но со поголем ефект почнуваат да се чувствуваат родовите стереотипи. За жените на возраст од 50 до 64 години, ставовите кон работата и традиционалните културни норми значително влијаат на неактивноста.
Како овие фактори ќе влијаат зависи и од образованието. За жените со основно или средно образование, родовите стереотипи играат важна улога, особено кај средовечните жени. Спротивно на тоа, за жените со високо образование, влијанието на овие културни фактори значително се намалува или исчезнува.
Преземање чекори
Како препорака за овие проблеми авторите на студијата предлагаат мерки како зголемена поддршка за домаќинките и за негувателките во смисла на флексибилно работно време и можност за работа од далечина, финансиски достапни услуги за грижа за децата како објекти за грижа и дневни центри и поддршка за самохраните мајки. Исто така треба да се соочиме и со културните пречки преку едукативни кампањи за родова еднаквост и отстранување на вкоренетите родови стереотипи. На крајот потребно е и да се подобрат вештините и квалификациите на неактивните жени преку инвестиции во образовни можности и стручно оспособување. Поддршката за жени што примаат социјална помош, особено во маргинализирани заедници, ќе им помогне да ја прекинат спиралата на ниско образование и неактивност.
Во однос на САД, пак, и тамошните проблеми, анкета на клиниката „Мејвен“ (Maven Clinic) објавена месецов покажа дека една третина од милениумките што доживуваат симптоми на менопауза рекле дека нивната работа била засегната од тоа. Од тие испитанички, 15 отсто преминале на помалку предизвикувачка кариера, а 28 отсто избегнувале преземање нови проекти.
Некои фирми се надеваат дека ќе го ублажат влијанието врз нивниот бизнис со помош на здравствени трошоци или обезбедување флексибилност како работа од далечина за вработените да можат полесно да се справат со симптомите. Околу 18 отсто од компаниите рекле дека моментално нудат или планираат да понудат поддршка за менопауза во 2025 година, според „Мерсер“ (Mercer). Тоа е зголемување од 15 отсто во однос на она што го понудиле во 2023 година или планирале да го направат во 2024 година.
Друштвото за менопауза, непрофитна организација фокусирана на здравјето на жените во средовечна возраст, неодамна објави патоказ за работните места. Препораките вклучуваат работи како преглед на здравствените планови за да се осигурат дека обезбедуваат доволно покритие, дозволување пристап до тоалети со санитарни производи и нудење флексибилност кога станува збор за распоредот и политиката за облекување.
„Мајкрософт“ (Microsoft Corp.) и „Стандард чартерд“ (Standard Chartered Plc) обезбедуваат придобивки за вработените на глобално ниво. „Јелп“ (Yelp Inc.) започна да нуди сесии предводени од експерти и едукативни содржини за перименопауза и менопауза за да помогне во „поттикнување поинклузивно и попродуктивно работно место“, посочи во е-пошта главната директорка за различност Мириам Ворен.
Сара Чаварија, главна извршна директорка на „Делта дентал“ (Delta Dental of California), рече дека се надева дека зборувањето за нејзиното сопствено искуство со перименопаузата и менопаузата помогнало да се намали дел од стигмата за нејзините 5.000 вработени, од кои повеќето можат да работат оддома кога им е потребно, според хибридната политика на компанијата.
„Колку повеќе вработените можат да ги водат тие разговори на работното место, толку повеќе тоа ни помага нам, кои ја структурираме работата, и толку побрзо организациите ќе можат да еволуираат“, рече таа.
.webp){kind=icon}
