text size
„Спејс екс“ (SpaceX) поднела тајна пријава за иницијална јавна понуда (IPO/ИПО), според извори запознаени со ситуацијата, приближувајќи ја компанијата за ракети, сателити и вештачка интелигенција на милијардерот Илон Маск кон најголемата котација досега.
Компанијата го поднела својот нацрт за регистрација на ИПО до Комисијата за хартии од вредност на САД (SEC/СЕК), посочиле извори кои побарале да останат анонимни бидејќи информацијата не е јавна. Ова ја поставува компанијата за котација во јуни, што би ја направило „Спејс екс“ првата од можни три мегапонуди, пред „Опен еј-ај“ (OpenAI) и „Антропик“ (Anthropic PBC).
Претставник на „Спејс екс“ не одговори веднаш на барањето за коментар.
Извори запознаени со состојбата велат дека компанијата може да бара вреднување во ИПО од над 1,75 билиони долари. „Спејс екс“ ја презеде стартап компанијата за вештачка интелигенција „Екс еј-ај“ (xAI) на Маск во зделка што ја процени компанијата на 1,25 билиони долари.
Во тајната пријава, компаниите можат да добијат повратни информации од регулаторот и да направат измени пред информацијата да стане јавна. Детали за понудата, вклучително бројот на акции кои ќе се продаваат и опсегот на цената, се очекува да бидат објавени во подоцнежна пријава.
Според извештајот на „Блумберг“, котацијата на „Спејс екс“ би можела да собере до 75 милијарди долари, што би го надминало сегашниот рекорд на „Сауди Армко“ (Saudi Aramco) од 29 милијарди долари во 2019 година.
Во меморандумот, „Спејс екс“ навел дека се подготвува за можна ИПО во 2026 година, насочен кон финансирање на „неверојатна стапка на летови“ за развој на ракетниот систем „Старшип“ (Starship), дата центри за вештачка интелигенција во вселената и база на Месечината.
Компанијата веќе ги вклучи „Банка на Америка“, „Ситигруп“, „Голдман Сакс“, „ЏП Моргна“ (JPMorgan Chase) и „Морган Стенли“ (Morgan Stanley) за водечки улоги во ИПО-то, а според упатени извори вклучени се и други банки.
„Спејс екс“ разгледува и структура со двојна класа на акции, која би им дала на инсајдерите, како Маск, дополнителна гласачка моќ за доминација во одлучувањето, известува „Блумберг“.
„Спејс екс“ доминира во вселенската индустрија со „Фалкон 9“ (Falcon 9), ракета која лансира сателити и луѓе во орбитата. Компанијата се фокусира на изградба на база на Месечината пред да ја реализира долгорочната идеја за испраќање луѓе на Марс, изјави Маск.
„Спејс екс“ е лидер и во индустријата за интернет услуги во ниска орбита преку „Старлинк“ (Starlink), систем од илјадници сателити кои обезбедуваат услуги на милиони корисници.
.webp){kind=icon}
