Прогнозата на „Нетфликс“ разочара, акцијата падна за 9 отсто

„Нетфликс“ го разочара пазарот со прогнозата за вториот квартал, што ја урна акцијата во тргувањето по затворањето на берзата.

Стриминг-гигантот објави дека очекува заработка по акција од 78 центи, што е под 84 центи, колку што предвидуваа аналитичарите. Ниту проекцијата за приходите не импресионираше - компанијата очекува 12,57 милијарди долари во периодот до јуни, додека процените беа нешто повисоки, околу 12,64 милијарди долари. По објавата на резултатите, акцијата падна околу девет отсто.

Истовремено, долгогодишниот претседател на управата и коосновач Рид Хестингс најави повлекување од одборот по 29 години, за да се посвети на филантропија и лични интереси.

Ова се првите резултати откако „Нетфликс“ во февруари се откажа од обидот за преземање на „Ворнер Брос дискавери“ (Warner Bros. Discovery). Тој процес со месеци вршеше притисок врз акцијата, најмногу поради стравувањата на инвеститорите од можно задолжување доколку зделката се реализира, но и поради прашањата дали компанијата сè уште има простор за раст.

Во писмо до акционерите, извршните директори Тед Сарандос и Грег Питерс порачаа дека „Ворнер Брос“ би бил „добар акцелератор на стратегијата, но само по вистинска цена“.

На крајот, „Парамаунт“ (Paramount) го презеде „Ворнер Брос“ за 110 милијарди долари, а трансакцијата сега е под регулаторна лупа во САД и Европа и наидува на силен отпор во Холивуд.

Сарандос им рече на инвеститорите дека од процесот научиле многу за спроведување големи аквизиции и нагласи дека компанијата и натаму ќе остане дисциплинирана во вакви потези.

Фокусот сега повторно се враќа на клучното прашање - задржувањето на претплатниците. Управата тврди дека задржувањето на корисниците се подобрило во сите региони во првиот квартал. Во март беа зголемени цените на претплатата, па стандардниот пакет без реклами сега чини 20 долари месечно.

Рид Хестингс/фотограф: Kyle Grillot/Bloomberg

Резултатите за првиот квартал беа подобри од очекувањата. Приходите пораснаа 16 отсто, на 12,3 милијарди долари, додека заработката по акција изнесуваше 1,23 долар, значително над процените. Дел од тој раст произлегува и од надоместокот од 2,8 милијарди долари за раскин на договорот што „Нетфликс“ го доби од „Парамаунт“ (Paramount).

„Бројките се одлични, но пазарот очекуваше уште повеќе“, изјави Рос Гербер за „Блумберг ТВ“, посочувајќи дека инвеститорите не беа воодушевени што компанијата не ги зголеми годишните прогнози.

Управата се обидува да го смири пазарот и нагласува три приоритети: повеќе квалитетна содржина, вложувања во технологија и поголем приход по корисник. Токму повисоките вложувања во содржина годинава краткорочно ќе извршат притисок врз добивката.

„Нетфликс“ планира дополнително да ја зајакне спортската понуда на глобално ниво, вклучувајќи и големи натпреварувања како Светскиот бејзбол-класик, кој веќе донесе рекорден раст на претплатници во Јапонија. Компанијата преговара и за проширување на соработката со Националната фудбалска лига.

До крајот на месецот пристигнува и нова верзија на мобилната апликација со вертикален видеофид за полесно откривање содржини. Покрај филмови и серии, „Нетфликс“ сè повеќе вложува и во видеоигри и поткасти.

Во меѓувреме, платите на двајцата извршни директори се намалија - Сарандос лани заработил 53,9 милиони долари, а Питерс 53,2 милиони долари.

Заминувањето на Рид Хестингс симболично означува крај на една ера. Токму тој ги финансираше почетоците на „Нетфликс“ како сервис за достава на ДВД по пошта и во 1999 година ја презеде улогата извршен директор од коосновачот Марк Рандолф. Тој ја водеше компанијата низ битката со „Блокбастер“ и беше клучен во преминот кон стриминг.

Под негово водство, „Нетфликс“ се прошири на повеќе од 190 пазари и израсна во една од највредните компании од забавната индустрија во светот. Од позицијата главен извршен директор се повлече на почетокот на 2023 година, оставајќи им го раководењето на Сарандос и Питерс.

„Најголемиот придонес не беше една одлука, туку фокусот на задоволството на корисниците и градењето култура што може да трае“, порача Хестингс во писмо до акционерите.

Сарандос ги отфрли шпекулациите дека неговото заминување е поврзано со обидот за преземање на „Ворнер Брос“.

„Ако некој очекувал некаква заткулисна драма, тоа не постои“, рече тој. „Рид силно ја поддржуваше таа аквизиција, како и целиот одбор.“