Трамп вели дека САД ќе се согласуваат со „Антропик“ и покрај спорот со Пентагон

Претседателот Доналд Трамп предвиде дека американската влада ќе има добри односи со „Антропик“ , што претставува остар пресврт во тонот кон компанијата за вештачка интелигенција која е во судир со Пентагон.

Трамп во вторникот изјави дека претставници на Белата куќа неодамна имале „многу добри разговори“ со извршни директори на „Антропик“ и дека „се согласуваме со нив“ иако тие се „радикална левица“.

„Тие се многу паметни, и мислам дека можат да бидат од голема корист. Сакам паметни луѓе. Сакам луѓе со висок коефициент на интелгенција, а тие дефинитивно имаат висок коефициент,“ рече претседателот во интервју за „Си-ен-би-си“. „Мислам дека ќе се согласуваме со нив без проблем.“

Во март, Министерството за одбрана ја означи „Антропик“ како ризик за синџирот на снабдување, нанесувајќи удар на работата на компанијата со владата. Преговорите пропаднаа откако агенцијата побара неограничен пристап до алатките на стартапот за законски цели, додека „Антропик“ бараше гаранции дека нивните производи нема да се користат за целосно автономни оружја или масовен надзор врз Американците.

„Антропик“ ангажираше голема лобистичка фирма во Вашингтон со силни врски со администрацијата на Трамп, во рамките на спорот. Главниот извршен директор на „Антропик“, Дарио Амодеи, минатиот петок се сретна со советници на Трамп во Белата куќа, меѓу кои и шефицата на кабинетот Сузи Вајлс, додека администрацијата бара поширок пристап до моќниот модел за вештачка интелигенција на компанијата - „митос“.