„Алфабет“ продаде обврзници во јапонски јени „тешки“ 3,6 милијарди долари

„Алфабет“ (Alphabet) продаде обврзници во вредност од 576,5 милијарди јени (3,6 милијарди долари) во најголемиот договор досега склучен во јапонска валута од страна на компанија што не е од Јапонија.

Дебитантската обврзница во јени на матичната компанија на „Гугл“ вклучува петгодишни обврзници во вредност од 200,5 милијарди јени, со каматна стапка од 50 базични поени над средните свопови. Имаше и шест други транши.

Најновата продажба на обврзници е дел од серијата продажби на обврзници што на интернет-гигантот му донесоа речиси 60 милијарди долари во последните четири месеци. Тоа е уште еден знак дека големите глобални корпорации сè повеќе гледаат кон пазарот на обврзници во јени додека се забрзува капиталната потрошувачка поттикната од вештачката интелигенција (ВИ). Продажбата на обврзници во јени од страна на нејапонски издавачи годинава пораснала за повеќе од 280 отсто, на 1,6 билион јени, според податоците што ги собра „Блумберг“.

„Додека американските инвеститори покажуваат знаци на замор, јапонските инвеститори и понатаму се гладни за принос и подготвени се да купуваат хартии од вредност од големи издавачи како ’Алфабет’“, изјави Такетоши Цучија, претседател на ФК (Fujiwara Capital). Хиперскалерите издаваат големи количества долг во долари за финансирање капитално интензивни центри за податоци, а другите инвеститори веројатно веќе се искористени, рече тој.

„Алфабет“ активно ги користи странските пазари на обврзници. Претходно овој месец компанијата ги продаде своите најголеми обврзници деноминирани во евра и канадски долари, собирајќи речиси 17 милијарди долари. Пред тоа продаде обврзници деноминирани во фунти и швајцарски франци, заедно со издавање долг во американски долари.

Дебитантските изданија обично нудат пошироки опсези, образец на кој одговара и продажбата на обврзници во јени, изјави Шунсуке Ошида, генерален директор на компанијата МИМ (Manulife Investment Management). „За странските издавачи на кои Јапонија не им е главен пазар, плаќањето одредена премија за дебитантска понуда може да ја поттикне побарувачката на инвеститорите за следните зделки“, рече тој.

Договорот исто така ја нагласува атрактивноста на дополнителниот принос достапен со корпоративните записи, бидејќи јапонските државни обврзници доживеаја невидена нестабилност откако Банката на Јапонија се откажа од децениската ултралесна монетарна политика. Десетгодишната транша од изданието на „Алфабет“ има купон од 3,189 отсто, што е значително повеќе од приносот од 2,71 отсто за државните обврзници со исто достасување.

Големото издание на обврзници на „Алфабет“ би можело да поттикне и други глобални компании да го искористат пазарот на јени. „Беркшир Хатавеј“ (Berkshire Hathaway), кој последен пат го користеше пазарот на должнички инструменти во јени во април, е редовен продавач уште од својата прва продажба на обврзници во јени во 2019 година.

Собирањето средства исто така би можело да ги поттикне очекувањата дека „Алфабет“ би можел дополнително да го продлабочи своето присуство во Јапонија. „Алфабет“ неодамна ги зголеми своите прогнози за капитални расходи на дури 190 милијарди долари во однос на претходната процена од 185 милијарди долари и приближно двојно ја зголеми својата потрошувачка во 2025 година.