Акциите на холандскиот производител на опрема за чипови АСМЛ (ASML) достигнаа нов историски максимум, што е еден од највпечатливите настани на европските берзи оваа година. Сепак, и покрај силниот раст, компанијата денес се тргува по најниска релативна валуација во однос на конкурентите во последните над десет години.
Акциите на АСМЛ пораснаа 64 проценти од почетокот на 2026 година, но тој раст сепак заостанува зад поширокиот американски сектор за чипови, кој е силно поттикнат од експлозивната побарувачка за алатки базирани на вештачка интелигенција (ВИ). Исто така, АСМЛ има послаб резултат од компании како АМ (Applied Materials), но и од некои клучни купувачи како „Самсунг“ (Samsung Electronics Co).
Иако АСМЛ индиректно профитира од трендови како раст на цените на мемориските чипови, инвеститорите поставуваат прашања за подготвеноста на компанијата да ги зголеми цените на своите производи, брзината на усвојување на новата генерација машини и капацитетот доволно брзо да го зголеми производството. Односот меѓу очекуваната цена на акцијата и идната заработка (forward P/E) во споредба со главните конкуренти моментално е најнизок во повеќе од една деценија.
„Постои многу загриженост дека, дури и ако побарувачката на пазарот биде многу силна, компанијата можеби нема да успее доволно да ја монетизира“, изјави аналитичарот на „Бернштајн“, Дејвид Даи. Според него, хеџ-фондовите често користат кратки позиции на АСМЛ за да финансираат купување други акции од секторот на полупроводници.
Од АСМЛ не сакаа да коментираат за движењето на сопствената акција.
Како единствен производител на ЕУВ (extreme ultraviolet) литографски машини, кои се клучни за производство на најнапредните чипови, АСМЛ често се смета за еден од најголемите инфраструктурни добитници на ВИ револуцијата - компанија која заработува продавајќи неопходна инфраструктура за технолошкиот бум.
Сепак, иако силната побарувачка доведе до скок на цените на чиповите, извршниот директор на АСМЛ, Кристоф Фуке, во април изјави дека компанијата нема да ги зголемува цените на машините само затоа што побарувачката е висока. Некои од тие машини чинат околу 350 милиони евра. Аналитичарите на „Барклис“ проценуваат дека зголемување на цените засега не е извесно.
Дополнителен предизвик претставува побавното усвојување на најнапредните системи на АСМЛ. ТСМЦ (Taiwan Semiconductor Manufacturing Co.), најголемиот производител на чипови во светот, соопшти дека нема да ги користи најновите машини на АСМЛ во производство пред 2029 година. Дури ни по тоа нема гаранција за нивна итна примена, смета Кен Хуи, директор на фондот БАФ (Bakewell Alpha Fund). Како што ТСМЦ продолжува да ја подобрува ефикасноста на постојните машини, можно е да нема потреба од таканаречените high-NA системи ниту за производство на A10 чипови, кои се очекуваат околу 2030 година.
Bloomberg
Инвеститорите затоа сè почесто се прашуваат дали АСМЛ добива сè помал дел од вкупната потрошувачка на производителите на чипови, бидејќи индустријата сè повеќе инвестира во процеси надвор од литографијата, како што се депозиција на материјали, etching и напредно пакување на чипови. Дополнително, се отвора прашањето дали компанијата може доволно брзо да ги зголеми производните капацитети за да ја следи растечката побарувачка. Сепак, дел од тие стравувања во последните месеци се ублажени, откако бројни аналитичари оценија дека АСМЛ го шири производството побрзо од претходно очекуваното.
„Банка на Америка“ на почетокот на месецот ја подигна целната цена на акцијата на АСМЛ на највисоко ниво меѓу сите брокерски куќи, проценувајќи дека до крајот на 2027 година компанијата ќе произведува 90 ЕУВ системи годишно. За споредба, минатата година испорача 48 вакви машини. Гледано преку односот меѓу идната цена и заработка, АСМЛ моментално се тргува со премија од околу 25 проценти во однос на АМ, што е едно од најниските нивоа од 2014 година. Во однос на „Лам“ (Lam Research), валуацијата е речиси изедначена, што не се случило од 2012 година. Сличен образец се гледа и во споредба со јапонската компанија ТЕ (Tokyo Electron Ltd). Таквата релативно ниска валуација би можела да привлече долгорочни инвеститори.
„Пазарот со тек на време би требало дополнително да ја препознае вредноста на АСМЛ“, изјави Џон Ламб, директор за акции во „Капитал груп“, втор најголем акционер на холандската компанија.
Според него, АСМЛ благ заостанува бидејќи најголемиот дел од инвестицискиот замав во последните месеци бил насочен кон американски и азиски производители на чипови. „Можно е АСМЛ едноставно да мора да изгради поголемо портфолио на нарачки, а за тоа е потребно време“, заклучи Ламб.
.webp){kind=icon}
