„Енвидија“ има удел од 21 милијарда долари во „Спејс екс“ и 30 милијарди долари во „Интел“

„Енвидија“ (Nvidia Corp.) во петокот објави дека поседува удел во компанијата „Спејс екс“ на Илон Маск вреден речиси 21 милијарда долари, како и удел од 30 милијарди долари во „Интел“ (Intel Corp.).

Според документот што „Енвидија“ во петокот го доставила до регулаторите, компанијата на 30 јуни поседувала околу 122,8 милиони акции на „Спејс екс“. Истовремено, поседувала околу 214,8 милиони акции на „Интел“.

Ова е првпат „Енвидија“ да ја објави вредноста на својот удел во „Спејс екс“ откако инвестираше во стартапот за вештачка интелигенција на Маск, „екс еј-ај“, кој на почетокот на годинава беше припоен кон „Спејс екс“ пред излегувањето на компанијата на берза. Тоа беше настан без преседан. „Енвидија“ во 2025 година инвестираше дури две милијарди долари во „Екс еј-ај“ преку финансирање што вклучуваше сопственички капитал и долг во рамките на посебен инвестициски инструмент наменет за купување на нејзините процесори за голем компјутерски проект на „екс еј-ај“, објави тогаш „Блумберг“.

Вредноста на уделот на „Енвидија“ во „Интел“ нагло порасна во однос на само три месеци претходно, кога, според регулаторните документи, изнесувала околу 9,5 милијарди долари. Таа инвестиција датира од минатата година, кога „Енвидија“ се согласи да инвестира пет милијарди долари во „Интел“ и најави дека двете компании ќе развиваат чипови за персонални компјутери и центри за податоци. Тој потег во тоа време беше оценет како изненадувачки чекор кој требаше да му помогне на големиот конкурент што се соочуваше со тешкотии.

На 30 јуни „Енвидија“ поседувала удели и во „Кохерент“ (Coherent Corp.), „Џенерејт бајомедисинс“ (Generate Biomedicines Inc.), „Небиус“ (Nebius Group NV), „Нокиа“ (Nokia Corp.) и „Синопсис“ (Synopsys Inc.).