Рекорден пад на акциите на „Алфабет“, обврските поврзани со ВИ надминуваат билион долари

„Алфабет“ (Alphabet Inc.) соопшти дека побарувачката за неговите услуги во облак расте брзо, укажувајќи на зголемување на вредноста на договорените работи што допрва треба да ги реализира. Сепак, повеќе од една третина од тоа квартално зголемување потекнува од заедничко вложување во кое „Алфабет“ има сопственички удел.

Овој податок беше откриен во кварталниот извештај објавен во четвртокот, кој покажува дека „Алфабет“ е изложен на поголеми ризици поврзани со вештачката интелигенција отколку што компанијата наведе за време на претставувањето на деловните резултати претходниот ден. Покрај обврските за идни купувања, закуп и други плаќања што надминуваат еден билион долари, а кои финансиската директорка Анат Ашкенази ги претстави за време на разговорот со инвеститорите, во извештајот се наведуваат и околу 98,5 милијарди долари потенцијални обврски што компанијата би морала да ги исполни под одредени услови. Тоа е приближно 23 милијарди долари повеќе отколку пред три месеци.

Акциите на матичната компанија на „Гугл“ во четвртокот паднаа за рекордни 13 проценти, на 283,82 долари, со што нејзината пазарна вредност беше намалена за речиси 500 милијарди долари. Компанијата во третиот квартал пријави разочарувачки приходи од пребарувањето и рекламирањето, што дополнително ја засили загриженоста на инвеститорите дека вештачката интелигенција го загрозува нејзиниот основен бизнис и дека рекордните инвестиции во оваа технологија не ги даваат очекуваните резултати.

Финансиските обврски на „Алфабет“ поврзани со вештачката интелигенција продолжуваат да растат. Тие опфаќаат плаќања за закуп на центри за податоци, гаранции за купување енергетска опрема што ја набавуваат партнерите, како и можна обврска да ги откупи системите со чипови за вештачка интелигенција од купувачите.

Вредноста на договорените, но сè уште нереализирани работи на Гугл клауд (Google Cloud) порасна на 560,8 милијарди долари на крајот на септември, од 513,9 милијарди долари три месеци претходно. Од тој износ, 16,8 милијарди долари се однесуваат на повеќегодишен договор со компанијата „Крукс“ (Crux AI), заеднички проект што „Алфабет“ го основа со „Блекстоун“ (Blackstone Inc.), а кој во извештајот е означен како поврзано лице. „Алфабет“ има малцински сопственички удел во оваа соработка и се обврзал да обезбеди гаранции за податочни центри и снабдување со енергија во вредност до 10 милијарди долари.

 

Инвеститорите ја сметаат вредноста на договорените, но сè уште нереализирани работи за клучен показател за идниот раст на приходите. Сепак, тие не биле целосно свесни колку растот на овие договорени работи на Гугл клауд зависи од побарувачката на претпријатие во чие основање учествувал самиот „Алфабет“, изјави Ден Морган, висок портфолио-менаџер во компанијата СТ (Synovus Trust).

„Тоа сепак донекаде го расипува впечатокот“, рече Морган. „Би било добро таа побарувачка да доаѓа од голем број надворешни клиенти. Ова е нешто што треба да нè натера да се запрашаме дали компанијата всушност сама ја создава побарувачката што потоа ја прикажува како доказ за својот успех.“

Според неговите зборови, инвеститорите во иднина ќе мора повнимателно да ги анализираат договорените работи на давателите на услуги во облак. Тој забележа дека голем дел од договорените работи на компанијата „Оракл“ (Oracle Corp.) потекнува од проектот „Старгејт“ (Stargate), соработка за изградба на податочни центри во која „Оракл“ е еден од клучните учесници.

Извештајот укажува и на тешкотии во бизнисот од кој „Алфабет“ го финансира развојот на вештачката интелигенција. Бројот на платени кликови во пребарувањето на „Гугл“ порасна за осум проценти во третиот квартал, по растот од 13 проценти во вториот квартал, иако извршниот директор Сундар Пичаи изјави дека бројот на пребарувања расте најбрзо во последните пет години.

За време на разговорот со инвеститорите, директорот за бизнис Филип Шиндлер рече дека силниот раст на бројот на пребарувања во режимот AI Mode влијаел врз приходите бидејќи компанијата остварува помала заработка од таквите пребарувања. Сепак, тој нагласи дека фирмата е оптимистична и дека го проширува прикажувањето реклами во AI Mode, за првпат и на меѓународните пазари.

Компанијата одби да ги коментира овие податоци.

Извештајот го откри и следново:

- „Алфабет“ за првпат призна дека неговите автономни агенти за вештачка интелигенција за време на тестирањето на моделите понекогаш преземале дејства „надвор од предвидениот опсег“. Ова е особено значајно бидејќи компанијата се подготвува овие агенти да им ги направи достапни на една милијарда корисници на апликацијата Џемини.

- И покрај падот на нивната вредност во текот на овој квартал, акциите на „Спејс екс“ сочинуваат голем дел од паричните средства и лесно ликвидните средства на компанијата. Од вкупно 265,1 милијарди долари што „Алфабет“ ги има во готовина и пазарни хартии од вредност, дури 75,2 милијарди долари се однесуваат на акции на „Спејс екс“, чија продажба е привремено ограничена.

- Вредноста на уделот на „Алфабет“ во „Антропик“ продолжува да расте, но побавно отколку претходно. Инвестициите на компанијата во приватни претпријатија, кои во најголем дел се однесуваат на уделот за кој „Блумберг“ утврди дека станува збор за „Антропик“, донеле околу три милијарди долари нереализирана добивка во минатиот квартал, во споредба со 77,4 милијарди долари во вториот квартал.

- Гаранциите поврзани со снабдувањето со енергија се повеќе од двојно зголемени, на 16,2 милијарди долари. „Гугл“ практично гарантира за обврските на партнерите што купуваат скапа енергетска опрема за неговите центри за податоци. Рокот на важење на тие гаранции сега се протега до јануари 2049 година, додека во јунскиот извештај како краен рок беше наведен септември 2026 година.

- „Алфабет“ би можел да биде принуден да ги откупи системите со чипови за вештачка интелигенција што ги продал, во вредност до 6,6 милијарди долари. Одредени купувачи имаат право да ги вратат системите на „Гугл“ по однапред утврдена намалена цена, иако „Алфабет“ тврди дека купувачите немаат поттик да го направат тоа.