Credit Suisse најави откуп на долг во износ од три милијарди долари

„Кредит суис“ (Credit Suisse Group) најави откуп на долг, во готовина, вреден околу три милијарди швајцарски франци (3 милијарди долари), што би било доказ за финансиската сила на банката по зголемената нестабилност на пазарот во последниве недели, поради загриженоста на јавноста за солвентноста на банката.

Понудата вклучува должнички хартии од вредност во евра и фунти во вредност од околу една милијарда евра и специјална понуда на хартии од вредност во американски долари до две милијарди долари, објави во петокот банката со седиште во Цирих.

Само неколку недели до објавата на големата стратешка ревизија, компанијата сè уште е во неволја. Акциите на банката годинава изгубија повеќе од половина од вредноста. Откупот на долгот е сличен одговор како оној на „Дојче банк“ (Deutsche Bank) во 2016 година, кога германската банка се најде во слични проблеми.

Во август, швајцарската банка го именуваше Диксит Џоши, поранешен извршен директор на Deutsche Bank, за главен финансиски директор, на местото на Дејвид Матерс. Ревизијата во банката најверојатно ќе опфати и продажба на имот, а се очекува значително да се намали инвестициското банкарство кое работи со загуби.

„Трансакциите се во согласност со нашиот проактивен пристап за управување со севкупниот состав на обврските и оптимизирање на каматните трошоци, кои ни овозможуваат да ги искористиме пазарните услови за откуп на долг по атрактивни цени“, се вели во соопштението на банката.

Инвеститорите се загрижени за тоа како банката ќе ги покрие трошоците за спроведување на планот со кој сака да ја покаже својата капитална сила, особено во време кога трпи големи загуби. Имено, на 30 јуни Credit Suisse имаше адекватност на капиталот од 13,5 отсто, што е далеку над меѓународниот регулаторен минимум од осум и швајцарскиот услов од десет отсто.

„Купувањето обврзници е начинот на кој Credit Suisse сака да излезе од кризата, односно тие размислуваат така да ги намалат своите CDS распони пред повторно да дојдат до пазарот на обврзници за да соберат капитал. Credit Suisse можеби го одбра вистинското време бидејќи тековниот пазар е еден од ретките прозорци годинава за компаниите да подигнат обврзници на јавниот пазар“, вели Алиша Гарсија Хереро, главен економист за Азија и Пацификот во Natixis SA.