.webp){kind=icon}
Холандскиот производител на пиво „Хајнекен“ (Heineken) соопшти дека гледа знаци на пад во побарувачката бидејќи продажбата во третиот квартал не ги исполнила очекувањата поради зголемените инфлациски притисоци.
Вториот по големина светски производител на пиво соопшти дека продажбата се зголемила за 8,9 отсто во третиот квартал, што е под просечната прогноза на аналитичарите од 11,8 отсто.
Очигледно, зголемените цени ги обесхрабрија љубителите на пивото да консумираат повеќе.
Акциите на Heineken паднаа за 7,51 отсто во тргувањето во средата.
„Гледаме зголемени причини за претпазливост во макроекономските прогнози, кои вклучуваат знаци на слабеење на пазарот“, рече главниот извршен директор на компанијата, Долф ван ден Бринк.
Производителите на пиво годинава главно успеаја да ги заштитат маржите со зголемување на цените, но јасно е дека постои граница до која тоа е прифатливо за потрошувачите.
Како што се наведува во соопштението на Heineken, рани знаци на забавување на побарувачката во некои делови на Европа се забележливи од крајот на септември.
Холандскиот производител на пиво ја задржа прогнозата за умерен раст годинава.
Според аналитичарот на Bloomberg Intelligence, Данкан Фокс, менаџментот на Heineken треба да инвестира мудро во промоција бидејќи цените ќе мора да ги надоместат зголемените трошоци поради инфлацијата во 2023 година.
Европа сочинува 40 отсто од приходите на производителот.
Нето добивката на компанијата во првите девет месеци падна за 29 отсто на 2,2 милијарди евра во однос на истиот период лани, но лани имаше еднократни ставки кои ја подобрија профитабилноста.
Акциите на Heineken годинава изгубија 17 отсто од вредноста.
