Израелски гигант купува уште еден проект за соларeн парк во Македонија

Израелскиот оператор со трговски центри  „Биг шопинг центри“ (Big shopping centers) преку својата компанија од Унгарија „Биг енерџи холдингс Кфт“ (Big energia holdings Kft) ја купува македонската компанија „Скај Солар ДОО“, која е во фаза на развој на проект за изградба и обезбедување на сите потребни лиценци за централа за производство на електрична енергија од соларни панели – фотоволтаици, дознава „Блумберг Адрија“.

Ова е веќе чeтврта аквизиција од страна на израелската компанија на македонски компании кои поседуваат проекти за изградба на соларни електрани.

Имено, израелската компанија преку својата компанија од Унгарија веќе се стекна со сопственост на македонските фирми „Бака енерџи“ и  „Чашица солар“, чии проекти за изградба на фотоволтаични централи се веќе во напредна фаза.

Израелците се сопственици и на „БИГ МЕГА Македонија-Штип Солар Оне ДООЕЛ“, фирма регистрирана на 12.10.2022 со основна дејност производство на електрична енергија, која исто така е во фаза на развој на централа за производство на електрична енергија од соларни панели – фотоволтаици.

„Биг шопинг центри“ е холдинг на компании, претежно во дејноста на недвижности со активности во САД, Израел, Србија, Црна Гора и Франција. Холдингот гради и инвестира во трговски центри и молови, деловни згради и логистички центри низ целиот свет, вклучително 30 центри во Израел, 10 во САД, 9 во Србија и многу други се воизградба.

Холдингот котира на берзата во Тел Авив и претставува една од најголемите компании за недвижности во Израел со удел од повеќе од три милијарди евра на тамошниот пазар. Во изминатите години, холдингот преку нивната унгарска компанија „Биг енерџи холдингс Кфт“ почна да инвестира во секторот на електрична енергија преку купување на удели односно цели друштва и преку развивање сопствени проекти.

Во моментов нема коментари за веста. Биди прв да коментира...

Остави коментар