.webp){kind=icon}
Компанијата „Интел“ (Intel) потврди дека ќе инвестира вкупно 25 милијарди долари во Израел, откако обезбеди 3,2 милијарди долари стимулации од владата на земјата.
Инвестицијата, најавена од израелската влада во јуни и досега непотврдена од „Интел“, ќе биде насочена кон проширување на фабриката за производство на чипови во Кирјат Гат, јужно од Тел Авив. Стимулациите сочинуваат 12,8 отсто од планираната инвестиција на „Интел“.
„Планот за проширување на локацијата Кирјат Гат е важен дел од напорите на 'Интел' да го зајакне својот глобален синџир на снабдување, заедно со постојните и планираните производствени инвестиции во Европа и во САД“, соопштија од компанијата во вторникот.
„Интел“ е меѓу производителите на чипови што го диверзифицираат производството надвор од Азија, која доминира во производството на овие технички компоненти. Пионерот за полупроводници се обидува да ја врати својата технолошка моќ откако беше претекнат од ривалите како „Енвидија“ (Nvidia) и ТСМ (Taiwan Semiconductor Manufacturing).
Израелската влада побара од „Интел“ да ги започне операциите во фабриката до 2028 година и да продолжи најмалку до 2035 година. „Интел“ исто така се обврза да потроши 60 милијарди шекели (16,6 милијарди долари) со израелските доставувачи во следната деценија, создавајќи илјадници директни и индиректни работни места. Во моментов компанијата вработува 11.700 луѓе во Израел. Работата на доградбата е веќе во тек.
Израелското министерство за финансии соопшти дека инвестицијата е најголема што една компанија ја направила во земјата.
„Моментот на оваа инвестиција, која доаѓа во време на силна конкуренција за инвестиции во чипови, е значаен израз на доверба во израелската економија“, се наведува во соопштението на Министерството.
