Сем Банкмен-Фрид уапсен на Бахамите

Сем Банкмен-Фрид, пропаднатиот коосновач на криптоберзата ФТХ (FTX), е уапсен на Бахамите откако американската влада поднесе кривична пријава, по неколкунеделните шпекулации дека средства на клиентите биле злоупотребени пред распадот на неговата криптоимперија.

„Банкмен-Фрид е во притвор, во очекување процес на екстрадиција“, изјави во понеделникот генералниот обвинител на островската држава Рајан Пиндер.

Федералните обвинители на Менхетн планираат да го отворат својот случај против него во вторник наутро, „и тогаш ќе имаат повеќе да кажат“, посочи во посебна изјава Демијан Вилијамс, американскиот обвинител за јужниот округ на Њујорк. Тој не навлезе во детали.

„Комисијата за хартии од вредност одделно одобри граѓански обвиненија поврзани со прекршување на законот за хартии од вредност од страна на Банкмен-Фрид“, посочи директорот Гурбир Гревал. Тие граѓански обвиненија се очекува јавно да бидат поднесени на Менхетн во вторник, се вели во соопштението.

Банкмен-Фрид се соочува со истраги во САД и на Бахамите, каде што беше седиштето на ФТХ. Едно од клучните прашања е дали средства од клиентите ѝ биле позајмени на трговската фирма „Аламеда рисрч“, во која Банкмен-Фрид бил исто така коосновач. Повеќе од 100 ентитети поврзани со ФТХ поднесоа барање за заштита од банкрот во САД на 11 ноември.

„Моќни докази“

„Да ​​го обвинат толку рано, кога не мораа, тоа ми кажува дека имаат неверојатно моќни докази“, вели Џин Роси, поранешен федерален обвинител. Роси додаде дека обвинителите веројатно имаат сериозна загриженост дека Банкмен-Фрид ќе побегне во јурисдикција каде што не може да биде екстрадиран.

Белата куќа одби да коментира за апсењето и обвиненијата.

Претседателката на комитетот за финансиски услуги на Претставничкиот дом, Максин Вотерс, им рече на новинарите дека сè уште се планираат сослушувања за колапсот на ФТХ. „Важно е американската јавност да разбере за ситуацијата со ФТХ и што се случува“, нагласи таа.

„Банкмен-Фрид (30) е задржан во полициската станица Кејбл бич во Насау“, изјавил службеник што работи во објектот. Лицето, кое одбило да го каже своето име кога со него контактирале по телефон, рекло дека сите ќелии се удобни, без да наведува во детали.

Објектот се наоѓа на околу 20 километри од луксузното одморалиште Албани Бахами, каде што живее Банкмен-Фрид, а се наоѓа во близина на главната туристичка зона.

Судењето на обвинетиот е закажано за вторник, според упатено лице.

Во интервјуа за медиумите, по распадот на ФТХ, Банкмен-Фрид призна големи менаџерски грешки, но исто така тврдеше дека никогаш не се обидел да изврши измама или да го прекрши законот.

Во својата подготвена изјава за сослушувањето во Претставничкиот дом на САД, каде што требаше да се појави денеска, тој даде груба процена за својата позиција.

„Би сакал да започнам со формална изјава под заклетва: се за***в“, посочува Банкмен-Фрид во нацрт-забелешките до кои дошле од „Блумберг њуз“ (Bloomberg News).

Тој додаде дека новите менаџери на компанијата, предводени од експертот за реструктурирање Џон Џеј Реј Трети, постојано ги одбивале неговите понуди да помогне добро да се прегледаат урнатините од пропаднатата криптоимперија. Банкмен-Фрид посочи дека Реј, кој сега ја води компанијата, не одговорил на пет негови мејлови.

Мрежата на дејствување на Банкмен-Фрид / Bloomberg

Криптоберза

Пред неговото апсење и долго пред неговата империја да западне во банкрот, федералните обвинители во Менхетн веќе го истражуваа ФТХ како дел од поширок преглед на берзите и потенцијални прекршувања на прописите против перењето пари, според Законот за банкарска тајна.

Истрагата, предводена од Единицата за сложени измами и компјутерски криминал, тргна по поинаков пат по катастрофалната имплозија на ФТХ.

„Обвинителите детално проверуваа дали стотици милиони долари биле неправилно префрлени на Бахамите во периодот кога ФТХ поднесе барање за стечај во Делавер, на 11 ноември“, посочува извор запознаен со ова прашање.

Тие, исто така, истражуваат дали ФТХ го прекршил законот со испраќање средства на „Аламеда рисрч“, банкротирана инвестициска фирма, исто така основана од Банкмен-Фрид, објави претходно „Блумберг“.

Минатата недела, обвинителите, ФБИ, претставници на Министерството за правда и новиот извршен директор на ФТХ и експерт за реструктурирање, Реј, се состанаа во седиштето на SDNY (Јужниот округ на Њујорк) - во центарот на Менхетн. На тој состанок не се зборувало за потенцијални обвиненија, според извор запознаен со разговорот.

Во моментов нема коментари за веста. Биди прв да коментира...

Остави коментар