.webp){kind=icon}
„Тојота“ (Toyota Motor Corp) соопшти дека корпоративното глобално производство достигна рекорд за ноември, делумно благодарение на солидната побарувачка на потрошувачите, иако компанијата предупреди на неизвесна перспектива поради постојаниот недостиг од полупроводници, како и неизвесноста со ширењето на ковид во Кина.
Светскиот број еден производител на автомобили минатиот месец произведе 833.104 возила, што е зголемување за 1,5 отсто во однос на истиот месец претходната година. Глобалната продажба се зголеми за 2,9 проценти, на 796.484 единици, се вели во соопштението на компанијата, објавено утрово.
Производството за возила ја одразува солидната побарувачка во области како што е Северна Америка и заздравувањето од претходната година, кога инфекциите со ковид во Југоисточна Азија ги нарушија синџирите на снабдување. Автомобилската индустрија сè уште е оптоварена со недостиг од чипови и други делови за автомобили, а ќе се соочи и со предизвици што произлегуваат од брзото ширење на ковид-случаите во Кина.
Во почетокот на ноември, „Тојота“ ја намали својата цел за глобално производство за фискалната година до март, држејќи се до конзервативните прогнози за профит поради недостигот од чипови.
Домашното производство на „Тојота“ во ноември се намали за 3,3 проценти во однос на истиот месец лани, односно беа произведени 266.174 единици, додека производството во странство се зголеми за 3,8 отсто, на 566.930 единици, се вели во соопштението.
Вклучувајќи ги возилата склопени од подружниците „Дајхатсу“ (Daihatsu Motor Co) и „Хино“ (Hino Motors Ltd), производството изнесува 982.552 единици, а продадени се 884.112 единици.
Акциите на „Тојота“ утрово се зголемија за 0,3 отсто на берзата во Токио, намалувајќи го падот годинава од 13 проценти.
Инаку, „Нисан“ (Nissan Motor Co) објави дека глобалното производство на годишно ниво се намалило за 23 проценти, на 248.961 единица во ноември, додека продажбата паднала за 26 отсто. Глобалното производство на „Хонда“ (Honda Motor Co) се намали за 12 отсто, на 325.996 единици минатиот месец, што претставува прв пад на годишно ниво во последните шест месеци.
