„Голдман Сакс“ (Goldman Sachs Group Inc.) работи на нова рунда кратења на работните места, која ќе биде објавена за неколку недели, рече главниот извршен директор Дејвид Соломон во својата традиционална порака до вработените за крајот на годината.
„Спроведуваме внимателна ревизија, дискусиите сè уште се во тек, но очекуваме дека намалувањето на бројот на вработени ќе се случи во првата половина на јануари“, рече Соломон. „Постојат различни фактори што влијаат на бизнис-опкружувањето, вклучувајќи го и заострувањето на монетарните услови, што ја забавува економската активност. За нашиот лидерски тим, фокусот е на подготовка на компанијата да ги преброди овие неповолни ветрови“, нагласи тој.
Компанијата може да елиминира дури осум отсто од својата работна сила, или до 4.000 работни места, за да спречи пад на профитот и приходите, изјавија упатени извори претходно овој месец, иако конечниот број може да биде помал. Од високиот менаџмент е побарано да идентификува потенцијални места со можност за кратење на трошоците, но не е утврден конечен број за намалување на работните позиции, посочија изворите, барајќи да останат анонимни, бидејќи станува збор за неофицијални внатрешни дискусии.
Портпаролот на компанијата со седиште во Њујорк одби да коментира.
„Треба да продолжиме со претпазливост и мудро да управуваме со нашите ресурси“, посочи Соломон во својата порака.
„Голдман“ е на пат да оствари годишен приход од околу 48 милијарди долари, што е второ најдобро остварување зад рекордот од минатата година. Скапиот упад во потрошувачкото банкарство и последователното повлекување, заедно со трошењата на технологија и операциите за интегрирање, придонесоа за повеќе трошоци годинава.
Предложените намалувања ќе означат поостро повлекување во плановите во споредба со кој било од ривалите на „Голдман“, додека раководството се бори да ги постигне целите за профитабилност. Аналитичарите предвидуваат дека приспособениот годишен профит на гигантот од Волстрит би можел да падне за 44 отсто.
Директорите на „Голдман“ истакнаа дека работната сила на банката се зголемила за 34 отсто од крајот на 2018 година, на повеќе од 49.000 до третиот квартал годинава.
.webp){kind=icon}
