text size
Алтернативните или пазарите во сенка (shadow markets) укажуваат на спектакуларно деби на акциите на „Спејс екс“ (SpaceX), сигнализирајќи раст од најмалку 35 отсто за компанијата на Илон Маск што работи во областа на ракети, сателити и ВИ.
Инструментите за тргување што ги нуди онлајн брокерската куќа „ИГ Интернешнл“( IG International) во петокот наутро по сингапурско време упатуваа на пазарна вредност од 2,4 билиони долари, што подразбира раст од повеќе од 35 отсто во однос на цената од 135 долари по акција и вреднувањето од 1,77 билион долари во иницијалната јавна понуда.
Перпетуалните фјучерси поврзани со „Спејс екс“, договори без рок на истекување, на криптоплатформата „Хиперликвид“ (Hyperliquid) се тргуваа околу 180 долари, што имплицира вредност од над 2,3 билиони долари. Во изминатите 24 часа беа истргувани повеќе од 143 милиони долари од овој инструмент, а моментално има повеќе од 208 милиони долари отворени позиции.
Дневен обем на тргување со перпетуални договори на „Спејс екс“ пред ИПО-то
Bloomberg
Пазарите за предвидувања дополнително ги засилија оптимистичките сигнали. Трговците на „Полимаркет“ проценуваат 70 отсто веројатност „Спејс екс“ да го заврши првиот ден на тргувањето со пазарна вредност над 2 билиони долари.
Иако овие сигнали укажуваат на одредено ниво на ентузијазам, тие не мора директно да се преточат во движење на цената на акциите. Пазарите во сенка обично се помалку ликвидни и помалку транспарентни од јавните пазари, па цените можат нагло да осцилираат и да бидат водени од мала група трговци, користење левериџ или краткорочни шпекулации, наместо од широка инвеститорска побарувачка.
Сепак, вреднувањето покажува колку е силен инвеститорскиот апетит за средства што се на пресекот меѓу ВИ и вселенската инфраструктура. Доколку дебито на „Спејс екс“ донесе силен раст уште првиот ден, тоа веројатно ќе биде позитивен сигнал и за идните иницијални јавни понуди на „Опен еј-ај“ (OpenAI) и „Антропик“ (Anthropic PBC), давајќи им на банкарите доказ дека јавните пазари можат да апсорбираат вреднувања од билиони долари, кои до пред неколку години беа незамисливи.
„Побарувачката за ИПО беше добра, а има и голем интерес за претходното тргување пред ИПО“, изјави Фабиен Јип, пазарен аналитичарка во ИГ.
Тоа е најпопуларното пред-ИПО тргување „што сме го имале досега, иако вреднувањето изгледа растегнато. Ако замавот во цените пред ИПО се одржи, тоа ќе постави преседан за следната генерација мегаемисии на акции“, додаде таа.
На краток рок, сепак, силното деби на „Спејс екс“ би можело да повлече капитал од групата акции позната како величествените седум, па дури и од „Тесла“ (Tesla Inc.), додека истовремено би ги поддржало доставувачите, конкурентите и акционерите поврзани со компанијата за ракети и сателити на Маск низ светот.
.webp){kind=icon}
