На „Спејс екс“ нема да ѝ биде дозволено брзо вклучување во S&P 500

S&P Dow Jones Indices ќе ги задржи постојните услови за вклучување во главните индекси, како што е индексот S&P 500, и ги одби предлозите што би им овозможиле на компании со исклучително висока пазарна капитализација, како „Спејс екс“ (SpaceX) на Илон Маск, побрз влез во индексот по котирањето на берза.

Провајдерот на индексот во четвртокот изјави дека нема да го скрати постојниот дванаесетмесечен период за нови јавни компании, ниту ќе се откаже од тековните барања за профитабилност и слободен промет на акции (free float) врз основа на големината на компанијата, што се разликува од поширокиот пресврт во индустријата што го прифаќаат конкурентите Nasdaq и FTSE Russell.

Одлуката доаѓа во време кога Волстрит се соочува со нова реалност: некои компании достигнуваат исклучителни размери пред воопшто да излезат на јавните пазари. Консултациите, кои започнаа на почетокот на годината, го отворија прашањето дали правилата за индексите, напишани за некој друг период, треба да се приспособат на компании што сега достигнуваат размери што некогаш биле резервирани за зрели блучип-акции, што во индустрискиот жаргон стана познато како „брз влез“ (fast entry).

Тежнеењето кон побрзо вклучување предизвика загриженост кај дел од инвеститорите, кои истакнуваат дека правилата за профитабилност, уделот на акции во слободен промет и историјата на тргување постојат токму за да се спречи индексите да трчаат по пазарна еуфорија. Покрај тоа, пребрзото додавање иницијални јавни понуди (ИПО) би можело да ги изложи пасивните фондови на поголема волатилност и да ги принуди да купуваат акции пред целосно да се воспостават сигурни пазарни цени, наведуваат инвеститорите.

Од друга страна, поддржувачите тврдат дека индексите треба што е можно побрзо да ги вклучат гигантските компании за да го одразуваат пазарот што инвеститорите навистина го поседуваат, додавајќи дека овие билионски компании може да бидат економски значајни многу пред да ги исполнат традиционалните услови за влез во индекс.

Таквиот исход значи дека „Спејс екс“, која го подготвува она што би можело да стане најголемото ИПО во историјата, нема да има право на вклучување во индексот S&P 500 најмалку една година по котирањето на берза. Компанијата исто така ќе мора да ги исполни постојните барања на индексот поврзани со профитабилноста и слободниот промет на акции.

„Навистина сум изненаден“, изјави Џејмс Сејфарт, аналитичар за ЕТФ во „Блумберг интелиџенс“. „Но S&P е лидер на пазарот и може да си дозволи да оди против трендот.“

 

Nasdaq неодамна ги промени своите правила, па, така, „Спејс екс“ би можела да се приклучи на индексот Nasdaq 100 - група на најголеми нефинансиски компании котирани на неговата берза - за само 15 трговски дена, што е намалување во однос на досегашниот минимум од три месеци. FTSE Russell примени сличен пристап и го скрати времето на чекање на само пет трговски дена.