Форд планира да укине околу 3.200 работни места ширум Европа, по намалувањето на работната сила во САД, бидејќи производителот на автомобили ги намалува трошоците заради промената што планира да ја направи кон производство на електрични возила.
Повеќето од засегнатите позиции се концентрирани во Германија, соопшти во понеделникот синдикатот по вонредниот состанок на работниот совет во фабриката на производителот на автомобили во Келн. Кратењата би влијаеле на приближно 65 отсто од развојните работни места во Европа.
Развојните активности во Германија ќе бидат преместени во САД, се вели во соопштението.
Кратењата во Европа доаѓаат откако компанијата веќе укина 3.000 работни места, главно во САД во втората половина на минатата година. Главниот извршен директор, Џим Фарли, планира кратења од три милијарди долари бидејќи се обидува да го зголеми профитот од традиционалните модели на мотори со согорување што би помогнало во финансирањето на развојот на електрични возила, инвестиција вредна околу 50 милијарди долари.
„Апсолутно имаме премногу луѓе на некои места, нема сомнеж за тоа“, им рече Фарли на аналитичарите во јули откако „Блумберг“ ја објави веста за претстојните кратења на работните места. „Имаме вештини кои повеќе не се потребни и имаме работни места кои треба да се сменат“.
Форд одби да ги потврди намалувањата во Европа, а портпаролот рече дека „не се донесени никакви одлуки“.
Во јуни, производителот на автомобили предупреди на намалување на работната сила во Европа, бидејќи развојот и производството на електрични возила е помалку трудоинтензивно. Компанијата планира да има речиси целосна линија електрични возила во регионот до крајот на деценијата
Во потрага по алтернативи
Во фабриката во Сарлуис во Германија вработени се околу 4.600 луѓе. Оваа компанија до 2025 глодина ќе престане да го произведува моделот „Фокус“, а потоа нема намера да прави други автомобили. Компанијата ги разгледува алтернативите за локацијата додека се држи до планираната инвестиција од две милијарди долари за електрични возила во својата клучна европска производна локација во Келн, каде што Форд има околу 14.000 работници.
Присуството на американскиот производител во регионот е во опаѓање по годините на реструктуирање, поради што автомобилскиот производител затвори или продаде голем број погони во услови на големи намалувања на работни места. Уделот на пазарот на патнички автомобили минатата година беше 4,4 отсто, со вкупна продажба од нешто повеќе од 510.000 автомобили, според Европската асоцијација на производители на автомобили.
За да го унапреди својот план за воведување електрични возила, Форд пред неколку години почна соработка со Фолксваген АГ. Компанијата ќе создава целосно електричен кросовер модел базиран на модуларната платформа на Фолксваген, почнувајќи од оваа година.
.webp){kind=icon}