text size
НЛБ банка ја заврши 2022 година со нето-добивка од околу 40 милиони евра (2,43 милијарди денари), што претставува раст од 9,7 проценти во однос на 2021 година, покажуваат податоците од финансискиот извештај на НЛБ. Притоа, банката бележи раст и во сегментот кредитирање и во сегментот депозити.
„Потврдувајќи ја својата позиција на системски значајна банка со висок пазарен удел во банкарскиот сектор во земјата, во 2022 година НЛБ банка оствари позитивни деловни резултати, раст на кредитите и депозитите и зголемена нето-добивка во однос на претходната година“, пишува во соопштението од НЛБ.
Во текот на 2022 година НЛБ го зголеми кредитирањето и за населението и за бизнис-секторот, со што оствари раст на кредитите од 8,3 проценти во споредба со 2021 година. Истовремено, и вкупните депозити на банката се зголемени за 4,5 проценти, што во најголема мера се должи на зголемувањето на тековните сметки кај домаќинствата и во корпоративниот сектор, при пад на орочените депозити.
„Во втората половина од 2022 година, НЛБ банка Скопје најави ново поглавје во своето работење, вложување во придружено друштво НЛБ ЛИЗ & ГО ДОО Скопје. Банката учествува во основната главнина на друштвото со паричен влог што одговара на 49 отсто од вкупниот основачки капитал на друштвото, заедно со NLB Lease&Gо, д.о.о. Љубљана. Со ова банката и понатаму ја проширува понудата на финансиски услуги на сите физички лица и компании на кои им се потребни лизинг-производи“, информираат од банката.
Од НЛБ очекуваат дека во претстојниот период ќе се одржи макроекономската стабилност на државата, при неизвесен деловен амбиент за реалниот сектор поврзан со последиците од глобалната криза, нарушувањата на каналите на снабдување, пазарите на енергија и инфлаторните притисоци.
„НЛБ банка и понатаму ќе продолжи да биде поддршка на населението и приватниот сектор во земјата, давајќи значаен придонес во макроекономскиот и финансискиот амбиент на државата. Во фокусот на работењето на банката ќе бидат дигитализацијата и зголемувањето на дигиталната пенетрација на клиентите, преку унапредување на капацитетите на дигиталните канали, со што ќе се обезбеди повисоко ниво на достапност на банката и подобро искуство на клиентите, како и поддршка на клиентите преку зајакнување на улогата на контакт-центарот. Дополнителен фокус е ставен и на проширување на палетата на производи и услуги, со акцент на ’зелените’ продукти како одговор на ризиците од климатските промени, како и на грижата за човечкиот капитал на банката и вложувањата во заедницата“, пишува во соопштението од НЛБ банка.
Во соопштението се потенцира дека потврда за успешното работење на НЛБ банка во изминатата година се и многубројните награди и признанија.
.webp){kind=icon}
