.webp){kind=icon}
„Тојота“ (Toyota Motor Corp.) ја задржа круната како најпродаван производител на автомобили во светот во 2022 година, зголемувајќи ја предноста во однос на „Фолксваген“ (Volkswagen AG), дури и кога прекините во синџирот на снабдување продолжија да влијаат на глобалното производство на автомобили.
Продажбата на групацијата, која ги вклучува и оние на нејзините подредени брендови „Дајхатсу“ (Daihatsu Motor Co.) и „Хино“ (Hino Motors Ltd.), била главно рамна на 10,5 милиони единици за годината, објави јапонската компанија во понеделникот. Продажбата на „Фолксваген“ падна за 7 отсто минатата година, на 8,3 милиони единици, што претставува најниско ниво на испораки во последните 11 години.
Ова означува трета последователна година на добивка за „Тојота“ во однос на нејзиниот германски ривал, но клучното прашање со кое сега се соочуваат јапонскиот и другите производители на автомобили е сеништето на слабеењето на глобалната побарувачка. Загриженоста поради избледениот апетит за нови возила се интензивираше, погодувајќи ги и акциите на „Тесла“ (Tesla Inc). „Гудјиар“ (Goodyear Tire & Rubber Co.) ги намалува работните места како одговор на послабото економско опкружување и зголемената инфлација.
„Тојота“ го зголемува водството во глобалната продажба на автомобили
Производителот го надмина германскиот ривал трета година по ред.
Bloomberg
Сепак, „Тојота“ сè уште вели дека не е во можност да направи доволно автомобили за да го скрати времето на испорака. Клиентите пријавуваат чекање со месеци или дури години за одредени модели. За фискалната година што започнува во април, „Тојота“ постави цел на производство од дури 10,6 милиони возила, со предупредување дека конечните испораки би можеле да бидат за 10 отсто помали доколку не успеат да набават доволно делови, особено полупроводници.
„С&П глобал мобилити“ (S&P Global Mobility) предвидува дека „Тојота“ ќе продолжи да ја зголемува својата предност пред „Фолксваген“ во 2023 година, со 10,4 милиони продадени лесни возила наспроти 7,99 милиони за германскиот производител на автомобили. Продажбата на „Фолксваген“ се предвидува да закрепне од 2024 година, додека „Тојота“ е на пат да надмине 11 милиони продадени лесни возила годишно до крајот на деценијата, според истражувачот.
„За двете компании, влијанието на ограничувањата во производството постепено ќе се намалува“, вели Јошиаки Кавано, аналитичар во „С&П глобал мобилити“ (S&P Global Mobility). „Генерално, умерено закрепнување и раст се гледаат на среден до долг рок“.
Коџи Сато (53), новоименуваниот извршен директор на „Тојота“, ќе биде под строга контрола додека се обидува да ја исполни таа цел. Инженер по струка, новиот лидер на светскиот производител на автомобили број 1 претходно раководеше со одделот за луксузни автомобили „Лексус“ (Lexus) и беше главен директор за брендирање на целата компанија.
Израснат во „Тојота“, откако ѝ се приклучи на компанијата пред повеќе од 30 години, Сато ќе го надгледува производителот на автомобили во периодот што може да биде најпредизвикувачки во неговата 86-годишна историја, додека двојните сили на електрификација и автоматизација се движат низ индустријата.
Јапонскиот производител на автомобили јасно стави до знаење дека верува во потребата да ги диверзифицира своите потези во различни технологии - од батерии, хибриди, водород и мотори со согорување - за да ги задоволи барањата на клиентите и успешно да премине кон иднината по бензинот.
