Стопанска банка ја заврши 2022 година со нето-добивка пред оданочување од 42,6 милиони евра, информираат од банката. Притоа, растот во делот на кредитирање е 10 отсто, а депозитите пораснале за пет проценти споредено со 2021 година. Постигнатите резултати во работењето се продолжение на континуираниот раст на банката и на силната посветеност кон клиентите, вработените и заедницата во целост, што го зацврстува статусот на Стопанска банка како лидер во пазарното учество во земјата, пишува во соопштението од банката.
„Стопанска банка успешно се справи со наметнатите предизвици од неизвесното финансиско опкружување на светско ниво и ја заврши годината со нето-добивка пред оданочување во износ од 2.617.019 илјади денари (42.557.860 евра). Истовремено, остварената добивка пред оданочување и исправка на вредност изнесува 3.851.117 илјади денари (62.626.713 евра), што претставува зголемување за 10 отсто во однос на 2021 година“, велат од Стопанска банка.
Менаџментот најавува дека фокусот на банката и во наредниот период ќе биде насочен кон кредитниот раст преку пласман на кредити за физички лица и за бизнис-секторот.
„Банката со најдолга традиција на пазарот минатата година започна ново поглавје во своето работење со инвестиција во новата компанија ‘Стопанска лизинг’, која на физичките лица и компаниите им нуди финансиски и оперативен лизинг преку највисоко ниво на финансиска поддршка и советување. Со ова банката го збогати финансискиот пазар со нови производи во сферата на лизингот“, информираат од Стопанска банка, додавајќи дека позитивните финансиски резултати се стабилна основа за натамошни нивни капитални инвестиции, како што е новата административна зграда во центарот на Скопје, чија изградба започна кон крајот на 2022 година.
Банката најавува и дека ќе продолжи со инвестициите во дигитализацијата на банкарските услуги во согласност со светските трендови и вложувањето во развојот и едукацијата на вработените.
.webp){kind=icon}
