text size
БМВ (BMW AG) ќе инвестира 800 милиони евра (872 милиони долари) во својата фабрика во Сан Луис Потоси, Мексико, за производство на електрични возила, како дел од пошироките напори за зајакнување на својата глобална производствена мрежа.
Повеќе од половина од инвестицијата ќе биде искористена за изградба на нова фабрика за склопување високонапонски батерии, соопшти денеска германскиот производител на автомобили, потврдувајќи ја јануарската најава на мексиканскиот претседател Андрес Мануел Лопез Обрадор.
Проширувањето ќе отвори околу 1.000 нови работни места, а производството на електрични возила е планирано да започне во 2027 година. Мексиканската фабрика ќе произведува електрични возила врз основа на „Ноје класе“ (Neue Klasse) на БМВ, новата платформа што е централна во напорите на компанијата да се справи со „Тесла“ (Tesla Inc), компанијата што продолжува да доминира во глобалната продажба на електрични возила.
БМВ има цел да ги преполови трошоците и да ги зголеми опсегот и брзината на полнење за 30 проценти во споредба со сегашните модели. Првите модели „ноје класе“ ќе бидат произведени до крајот на 2025 година во фабриката на БМВ во Дебрецен, Унгарија, каде што производителот на автомобили неодамна ги удвои инвестициите на две милијарди евра. Во октомври БМВ соопшти дека ќе инвестира 1,7 милијарда долари во својот производствен центар во Јужна Каролина за производство на електрични возила за американскиот пазар.
Компанијата очекува до 2030 година најмалку половина од нејзината продажба да биде од целосно електрични возила, но посочува дека целта може да се постигне и порано.
.webp){kind=icon}
