.webp){kind=icon}
„Форд“ (Ford Motor Co.) ќе укине околу 3.800 работни места низ Европа како најнов знак за индустриското нарушување предизвикано од транзитот на глобалниот автомобилски сектор кон електрични возила.
Работниците во Германија и во Британија ќе бидат најтешко погодени, со околу 2.300 односно 1.300 позиции што ќе бидат елиминирани, соодветно, во текот на следните три години, соопштија од „Форд“ во вторникот. Германскиот „ИГ метал“ (IG Metall) минатиот месец процени дека околу 3.200 луѓе ќе останат без работа.
„Трасирањето на патот кон одржлива профитабилна иднина за 'Форд' во Европа бара широки активности и промени во начинот на кој ги развиваме, конструираме и продаваме нашите возила“, рече Мартин Сандер, генерален директор на бизнисот со електрични возила на „Форд“ во Европа. „Ова ќе влијае на организациската структура, талентот и вештините што ќе ни требаат во иднина“.
„Форд“, кој својата линија на модели во Европа ќе ја префрли само на батерии до 2035 година, претходно соопшти дека помалата комплексност на електричните автомобили значи дека компанијата може да го намали персоналот од тимовите за развој на производи. Компанијата исто така ги намалува работните места во САД, бидејќи главниот извршен директор Џим Фарли има цел да заштеди три милијарди долари за да помогне во финансирањето на скапата промена кон електрични возила.
Компанијата има околу 45.000 работни позиции во Европа, а нејзината најголема фабрика во Келн има околу 14.000 работници. Во Британија компанијата има околу 7.000 директни вработени, кои произведуваат дизел-мотори во Дагенхам и менувачи во фабриката во Хејлвуд. Исто така, има инженерски центар во Дантон, во Есекс. Компанијата има намера да ги спроведе кратењата преку доброволни договори.
Потврдата на американскиот производител за дополнително намалување на неговиот европски бизнис придонесува за долгиот период на пад во регионот. Годините на реструктурирање доведоа до продажба или затворање на голем број фабрики во услови на големи кратења на работните места. Неговиот удел на пазарот на патнички автомобили минатата година беше 4,4 отсто, со вкупна продажба од нешто повеќе од 510.000 автомобили, според Европската асоцијација на производители на автомобили.
Следна на ред е фабриката на „Форд“ во Сарлуис, Германија, каде што 4.600 работници го прават моделот „фокус“. Производителот на автомобили ќе престане да го произведува возилото до 2025 година, без да планира таму да произведува други автомобили потоа. Компанијата е во преговори со потенцијални купувачи на фабриката, вклучувајќи ја и кинеската БЈД (BYD Co.), според извори запознаени со ова прашање.
