.webp){kind=icon}
„Амазон“ (Amazon.com Inc) бара од вработените да работат од канцеларија најмалку три дена во неделата, укинувајќи ја претходната политика што им ги препушташе таквите одлуки на високите менаџери. „Мандатот стапува во сила на 1 мај“, рече главниот извршен директор Енди Џеси во белешка до вработените, објавена на корпоративниот блог на „Амазон“. Џеси рече дека ќе има исклучоци, вклучувајќи и за некои работи за продажба и поддршка на клиентите, но тоа ќе биде минимално.
„Тимовите имаат тенденција да бидат подобро поврзани еден со друг кога почесто се гледаат лично. Има нешто во тоа да се биде лице в лице со некого, да го гледаш во очи и да видиш дека е целосно внесен во разговорот, тоа ги поврзува луѓето“, рече Џеси.
Барајќи од вработените да доаѓаат почесто, „Амазон“, вториот по големина приватен работодавец во САД, по „Волмарт“ (Walmart Inc), се приклучува во редот компании што укинуваат дел од флексибилноста за работа од кое било место, понудена за време на пандемијата.
„Епл“ (Apple Inc), „Алфабет“ (Alphabet Inc) и „Мајкрософт“ (Microsoft Corp) сега бараат од вработените да работат во канцеларија одреден минимален број денови. „Амазон“ во октомври 2021 година рече дека менаџерите може да одлучат колку често вработените треба да бидат во канцеларија. Оттогаш посетеноста е нерамномерна, велат вработените. Кампусот, чие седиште е во центарот на Сиетл, е раздвижен некои денови, а во други е град на духови. Некои вработени, особено во дисперзираните тимови, работат во канцеларијата неколку дена во неделата. Други едвај работеле во канцеларија од почетокот на пандемијата. Портпаролот на „Амазон“ одби да даде детали за тоа колку вработени моментално одат во канцелариите.
Враќањето на значителен број персонал може да ги зајакне трговските области околу локациите на „Амазон“. Компанијата е главен закупец на канцеларии во заливот Сан Франциско, Њујорк, Остин, Тексас и областа Лос Анџелес, меѓу другите градови.
„Нашите заедници ни се важни, а таму каде што можеме да играме дополнителна улога во помагањето да се закрепне од предизвиците во последните неколку години, возбудени сме што го правиме тоа“, рече Џеси.
