Линкдин (LinkedIn), социјалната платформа во сопственост на „Мајкрософт“, планира да ја затвори својата апликација во Кина и да укине 716 работни места како дел од дополнителното намалување на присуството на американската платформа за професионално вмрежување во втората по големина економија во светот.
Сфаќајќи дека конкуренцијата се засилува, Линкдин донесе одлука да ја исклучи локалната апликација за вработување наречена „Инкариер“ (InCareer) до август. Планот е да се отпуштат локални тимови за инженерство и развој на производи, и да се намали бројот на вработени во продажба и маркетинг, се вели во блогот на компанијата.
Со овој потег речиси завршува повлекувањето од најголемиот светски интернет пазар што започна пред околу две години, откако Линкдин се соочи со тешка регулаторна контрола, а истовремено локалните ривали постигнаа напредок.
„Ќе ја фокусираме нашата стратегија во Кина за да им помогнеме на компаниите кои работат во оваа земја при вработување, сместување и обука во странство“, се вели во интерниот меморандум на компанијата. „Иако „Инкариер“ доживеа одреден успех во текот на изминатата година благодарение на нашиот силен тим со седиште во Кина, тој исто така наиде на жестока конкуренција и предизвикувачка макроекономска клима“.
По влегувањето на кинескиот пазар во 2014 година, Линкдин изгледаше како пример за работата на американските интернет компании во земјата. Во замена за дозвола за работа во Кина, компанијата се согласи да ја ограничи содржината за да се усогласи со правилата за цензура во земјата. Платформата во еден момент имаше околу 52 милиони корисници во Кина, додека други американски компании како Твитер и Фејсбук беа забранети.
Во 2021 година, компанијата објави дека ја затвора локалната верзија на Линкдин, наведувајќи го предизвикувачкото деловно опкружување како причина и со тоа стана последната американска социјална мрежа што престанува со работа.
.webp){kind=icon}