.webp){kind=icon}
Менаџментот на германската авиокомпанија „Луфтханза“ (Deutsche Lufthansa AG) се извини за прекините и откажувањата што предизвикаа конфузија во глобалната воздухопловна индустрија и предупреди дека ситуацијата нема да се подобри во блиска иднина бидејќи превозниците и аеродромите се борат да ги обноват операциите по падот поради пандемијата.
Во писмо испратено до клиентите преку ноќ, најголемата европска авиокомпанија ги изложи причините за хаосот, од недостаток на персонал, до војната во Украина. Превозникот вели дека глобалната авијација ги достигнува границите на расположливите ресурси, што претставува фрустрација во напорите на авиокомпаниите да ги надминат загубите по коронавирусот.
„Можеме само да ви се извиниме за ова“, се вели во соопштението на „Луфтханза“. „Во следните недели, бидејќи бројот на патници продолжува да расте, било да е тоа за одмор или службени патувања, ситуацијата веројатно нема да се подобри на краток рок“, додаваат од таму.
Водечката германска авиокомпанија откажа вкупно 3.100 летови, откако бран на инфекции со коронавирус го влоши недостигот на персонал, дополнувајќи го хаосот за патувања во Европа во моменти кога започнува клучниот период на летни одмори. Отпуштајќи илјадници вработени за време на пандемијата, авиокомпаниите и копнените операции на аеродромите сега се борат да ја задоволат зголемената побарувачка за патувања. „Луфтханза“ соопшти дека индустријата е во трка за повторно вработување на илјадници луѓе, но тоа би било стабилизирачки фактор дури во текот на претстојната зима.
Војната во Украина го ограничи достапниот воздушен простор во Европа, предизвикувајќи масивни тесни грла на небото и дополнителни одложувања, соопшти „Луфтханза“. За да помогне во решавањето на ограничувањата во капацитетот, компанијата вчера во посебно соопштение соопшти дека враќа некои од своите суперџамбо „ербас А380“ авиони кои беа повлечени за време на пандемијата.
Покрај недостигот на персонал, некои други авиокомпании и аеродроми се борат и со работни спорови бидејќи работниците бараат повисоки плати за да се надоместат зголемените трошоци за живот. Работниците на „Рајанер“ (Ryanair Holdings Plc) организираа групни откази во Шпанија, Италија и Франција во текот на викендот. Персоналот за проверка на „Бритиш Ервејс“ (British Airways) се закани со штрајкови на аеродромот Хитроу во Лондон.
