.webp){kind=icon}
Германската авиокомпанија Луфтханза во последен момент спречи штрајк на пилотите, со тоа што им понуди покачување на платите. Со таквиот потег ќе се избегнат откажувања на летови но, од друга страна се комплицира финансиската состојба на авиокомпанијата, чија цел е преку зголемување на маржите да ги намали големите долгови натрупани од периодот на пандемијата, кога практично се работеше со многу мал капацитет.
Портпаролот на синдикатот на пилотите рече дека се сложиле да го откажат дводневниот штрајк, што требаше да започне од ноќеска на полноќ. Ниту компанијата, ниту синдикатот за сега не ги коментираат деталите и условите во новата понуда од Луфтханза.
Акциите на Луфтханза во попладневното тргување на берзата во Франкфурт забележаа раст од 3,1 отсто, а од почетокот на годината имаат пад од 3 отсто.
Прочитај повеќе
Штрајк на пилотите од 'Луфтханза', откажани 800 летови
Вкупно околу 130.000 патници ќе бидат погодени бидејќи „Луфтханза“ укинува 800 летови во двата најголеми германски центри.
01.09.2022
Доколку се реализираа овие штрајкови, тоа ќе значеше откажувања на нови летови, откако Луфтханза веќе откажа околу 8.000 летови за време на летната сезона.
Авиокомпанијата претходно во текот на летово еднаш веќе успеа да избегне штрајк од страна на аеродромскиот персонал, со тоа што им даде подобри плати.
На крајот од минатиот месец најголем дел од синдикатот, кој што брои околу 9.600 членови, гласаше за штрајкување. Пилотите на Луфтханза бараат зголемување на платите за да можат да се справат со двоцифрениот раст на цените.
Штрајкот од минатата недела предизвика откажување на некоку стотици летови на овој авиопревозник од своите бази во Франкфурт и Минхен.
Европската авиоиндустрија последните месеци е оптоварена со хаотично работење, главно поради недостиг од аеродромски персонал во секторите за безбедност, контрола, како и одделот задолжен за грижа за багажот на патниците, па додека да се вработи дополнителен персонал, сегашните вработени вршат притисок за поголеми плати во услови на инфлација.
Во меѓувреме, побарувачката за патувања се зголеми бидејќи луѓето се враќаат на деловните патувања и одморите откако во поголемиот период од последните две години беа заглавени во рестрикции, ограничувања на движењата и мерки за справување со пандемијата, а тоа ја втурна Луфтханза до раб на банкрот во 2020 година и ја остави авиокомпанијата со долгови од милијарди евра.
Во обид да го намали долгот на авиокомпанијата, главниот извршен директор на Луфтханза, Карстен Шпор, вети дека ќе ја зголеми маржата на заработка на минимум 8 отсто до 2024 година. Но, спорот со синдикатот и превирањата околу висината на платите сугерираат на тоа дека Шпор може да има проблеми со постигнување на претходно поставената цел, бидејќи се обидува да ја избалансира потребата за поголем број зработници со настојувањето да ги намали трошоците.
