Надлежните бараат да се врати старата тарифа за осигурување од автомобилска одговорност

Комисијата за осигурување од автомобилска одговорност денеска им укажала на Националното биро за осигурување и на регулаторот Агенцијата за супервизија на осигурувањето да им предложи на друштвата за осигурување до крајот на денешниот ден да ги стават во мирување одлуките за зголемување на трошоците и да ги вратат на ниво од пред 25 април 2024 година, соопшти Министерството за финансии.

„Ваквото укажување е со цел обезбедување  транспарентност и предвидливост на процесите, имајќи предвид дека компаниите ниту поединечно, ниту преку Националното биро за осигурување го немаат известено регулаторот, односно Агенцијата за супервизија на осигурувањето ниту Комисијата дека планираат да ги зголемат трошоците по основ на премијата за вршење на дејноста на осигурување, и на тој начин не е обезбеден инклузивен пристап и кооперативност со сите засегнатите страни при донесување на одлуките“, велат од Министерството.

Комисијата за осигурување од автомобилска одговорност на денешната седница  побарала од Агенцијата за супервизија на осигурувањето, да изготви анализа за оправданоста и исправноста на донесените одлуки од страна на друштвата за осигурување, во насока на заштита на крајните корисници, а со цел обезбедување сеопфатна информација за донесување објективна  и транспарентна одлука.

„Во правец на ова е укажувањето кон регулаторот за ставање во мирување на одлуката за зголемување на цената на трошоците од страна на друштвата за осигурување“, наведуваат од Министерството.

Истовремено, Комсијата побарала од друштвата за осигурување преку Националното биро да дадат свој придонес во изготвување на анализата и предлог-заклучоци за промена на тарифата на премии за осигурување на сопствениците на моторни возила од одговорност за штети предизвикани на трети лица.

На состанокот, Комисијата одлучила во најскоро време по доставување на анализата од Агенцијата за супервизија на осигурувањето да свика седница, да ја разгледа доставената информација и да донесе соодветни заклучоци.

Во моментов нема коментари за веста. Биди прв да коментира...

Остави коментар