Од доброволните осигурувања најпродавано останува осигурувањето имот, со вложувања од три милиони евра за еден месец, пред каско-осигурувањето со два милиони евра и здравственото осигурување со 1,7 милион евра. Јули е рекорден според продажбата на неживотно осигурување пред сè затоа што значајно расте продажбата за задолжителното автомобилско осигурување, а тоа е резултат на регистрирани над 85.000 возила за само еден месец, информираат од Агенцијата за супервизија на осигурувањето (АСО).
Вложувањата на граѓани, институции и компании во неживотни осигурувања во јули достигнаа 21 милион евра. Тоа претставува рекордно односно највисоко месечно ниво на вложување во осигурителни производи во првите седум месеци годинава.
Depositphotos
Досега месеци со највисоки вложувања во осигурувањето, според официјалните податоци, беа јануари и јуни, со по 19,8 милиони евра. Побарувачката за осигурување во јули е за 13 отсто повисока од продажбата на осигурување неживот во јануари и во јуни.
Од сите класи на доброволни осигурувања, очекувано, најмногу пари се вложени во осигурување имот. Граѓани, фирми и институции склучиле над 14.000 договори, во кои вложиле три милиони евра.
На второто и третото место според продажбата на доброволни осигурувања во јули беа каско-осигурувањето за моторни возила и приватното здравствено осигурување. Во осигурување штети врз своите возила (каско) осигурениците во јули вложиле 2,05 милиони евра, што претставува раст од девет отсто во однос на јуни.
Од продажбата на приватно здравствено осигурување компаниите акумулирале 1,7 милион евра.
Вредно за истакнување е дека за време на сезоната на летни одмори продажбата на патничко осигурување достигна ниво од 728.000 евра, што е за 16 отсто повеќе во однос на претходниот месец односно јуни. Раст на продажбата на патничко осигурување од шест отсто има и во однос на јули лани.
Во најголемата осигурителна класа осигурувањето од автомобилска одговорност, која е наедно и задолжителна со закон со цени регулирани од државата, има најголем раст на продажбата. Во јули компаниите од продажба на полиси инкасирале 11,3 милиони евра. Во споредба со истиот месец лани, во јули годинава продажбата е зголемена за над еден милион евра.
.webp){kind=icon}
Во моментов нема коментари за веста. Биди прв да коментира...