.webp){kind=icon}
Граѓаните наплатиле над 7,2 милиони евра (443 милиони денари) од осигурувањето живот во првите пет месеци од годинава, покажуваат официјалните податоци што ги доставуваат шесте компании за осигурување живот до Агенцијата за супервизија на осигурувањето (АСО). Во овој период, над 2.500 граѓани добиле надоместок за штетите што биле покриени со полисите за осигурување живот, издадени од пет компании за осигурување живот.
„Најмногу средства во овој период биле исплатени по полисите за осигурување живот со штедна компонента. Ова е најстариот производ на животно осигурување, кој на нашиот осигурителен пазар се продава 20 години. Негова главна карактеристика е тоа што, покрај осигурувањето живот, нуди и штедење на вложените средства. Овој продукт овозможува осигуреникот, по истекот на договорот за осигурување, да ги добие вложените средства зголемени со камата за конкретниот период“, соопшти АСО.
Depositphotos
Во првите пет месеци од годинава од ова осигурување граѓаните наплатиле од компаниите за осигурување 5,95 милиони евра (366 милиони денари). Во најголема мера, во првите пет месеци, парите им биле исплатени на осигуреници на кои им завршил договорот за осигурување и ги добиле своите вложени средства зголемени за каматата.
На второ место според висината на исплатените средства во првите пет месеци е осигурувањето со инвестициска компонента, кое е популарно познато како осигурување „јунит линкд“. Овој осигурителен продукт, заедно со осигурувањето живот, им овозможува на граѓаните и вложување поголем дел од уплатените средства во удели на инвестициски фондови, соопшти АСО.
Најмало учество во исплатените средства во овој период има осигурувањето без штедна компонента, кое е познато како ризикоосигурување. Кај овој продукт, осигуреникот го осигурува својот живот и доколку настане смрт во осигурениот период, компанијата им ја исплаќа осигурената сума на членовите на неговото семејство или на носителите на правото на обесштетување што ги навел осигуреникот во својата полиса.
АСО
Поради смрт на осигуреници во овој период компаниите за осигурување живот им исплатиле 613.000 евра (37,7 милиони денари) на нивните семејства или на лицата што биле носители на правото на осигурување.
