Расте бројот на нови ковид случаи заради последните варијанти на Омикрон кои се шират побрзо. Светската здравствена организација предупреди дека за разлика од мај кога дневно во светот биле регистрирани по околу 150.000 новозаразени, сега бројката се искачи на 500.000. Пораст има во сите земји, а најмногу во Португалија, Луксембург, Франција, Грција, Кипар, Германија и Австрија.
Состојбата се влошува и во регионот.
Раст на бројот на новите КОВИД позитивни има и во земјава.
Согласно податоците од Институтот за јавно здравје, Министерството за здравство информираше вчера дека во последните 24 часа регистрирани се нови 411 случаи.
Нема измени во однос на мерките за заштита. Маската е задолжителна во јавниот превоз, здравствените установи и аптеките. Се друго е оставено на совест на на граѓаните. За есен експертите најавувааат влошување на состојбата.
Првиот корона бран ја чинеше земјава 760 милиони евра
Бизнисмените стравуваат од нов силен бран на корона и евентуални нови мерки кои би ги побарале здравствените власти. Велат во овој момент, македонската економија нема да го издржи тоа. Затворањето во 2020 година ја чинеше државата 760 милиони евра односно пад на БДП од 6,1 отсто. Ланскиот раст од над четири отсто не може да ја надомести силната загуба од карантинската година. Од тогаш, состојбата во економијата е драматично влошена, порасна долгот и на државата и на приватниот сектор, а скапите енергенси и високата инфлација сега се дополнителен товар.
Компаниите меѓу чеканот и наковалната – ќе се борат за опстанок и ќе прилагодуваат плати
Од Организацијата на работодавачи (ОРМ) велат дека есента им предизвикува страв и од здравствен и од економски аспект. Сегашната позиција е многу полоша од таа во 2020 затоа што пандемискиот период траеше многу долго и предизвика многу трубуленции, војната во Украина дополнително ја клекна економијата, вели за Bloomberg Adria претседателката на ОРМ, Владанка Трајкоска. Според неа, растот на цените на репроматеријалите веќе ги носи во ситуација да размислуваат дали да го прекинат процесот на работа на одреден период, односно до стаблизирање на берзанските цени.
Владанка Трајкоска
„Планови за функционирање на есен секако се прават, но неизвесноста и непознавањето на теренот не прави да бидеме несигурни во она што не очекува. Од друга страна, дополнителен реален предизвик со кој се соочуваме, а кој на есен ќе не обремени дополнително е висината на платата на работниците. Реалната инфлација, да бидеме свесни дека не само што се одразува на финансиската ситуација на компаниите, истата посилно се манифестира врз буџетот на македонските семејства. Оттука, платата на нашите вработени на есен кога ќе затропа повисоката цена на струјата, енергенсите, храната ќе мора да биде прилагодена на реалните трошоци за живот во спротивно ќе имаме незадоволен и несреќен работник“, вели Трајкоска.
Според неа, есента ќе донесе големи економски турбуленции кои ќе се запишат во историските читанки како период на опстанок или пропаѓање на голем број компании.
„Се надевам дека повеќето од македонските стопанственици ќе излезат како победници од оваа еконмска војна“, завршува Трајкоска.
Текстот е едитиран во вториот и третиот пасус
.webp){kind=icon}
