text size
Падот на цените на горивата ги намали приходите на нафтената дистрибутивна компанија „Окта“ за 37 отсто во вториот квартал годинава во однос на истиот период лани. Приходите од продажба во тој период изнесуваат 10.347 милиони денари (168,2 милиони евра). Сепак, приспособената ЕБИТДА (добивка пред оданочување, камати и амортизација приспособена за ефектот на резервите) изнесува 236 милиони денари (3,8 милиони евра), што е за 29 проценти повеќе од вториот квартал од 2022 година. Растот на добивката пред оданочување, камати и амортизација што е приспособена на резервите се должи на солидната побарувачка за горива на домашниот и извозниот пазар, како и на зголемените маржи.
Во вториот квартал компанијата остварила нето-приходи од пет милиони денари, а како резултат на влијанието од падот на меѓународните цени на горивата е забележан и негативен ефект на резервите од 127 милиони денари, наспроти позитивниот ефект на резервите од 267 милиони денари во вториот квартал од 2022 година.
Ако се анализираат двата квартала од почетокот на годината, приходите од продажба бележат пад од 19 отсто, а добивката пред оданочување е намалена за 81 отсто. Приспособената ЕБИТДА има раст од 54 отсто, до ниво од 448 милиони денари (7,3 милиони евра).
Окта АД
„Тековниот долготраен притисок на инфлацијата и геополитичките тензии по санкциите врз извозот на руската нафта создадоа предизвици за бизнисите низ светот, вклучувајќи го и нафтениот сектор. И покрај ова опкружување полно со предизвици, ’Окта’ останува главен снабдувач со горива во земјата и регионот, обезбедувајќи им непречени услуги на потрошувачите и придонесувајќи во голема мера за закрепнувањето на економијата“, соопштија од компанијата.
Во вториот квартал од 2023 година компанијата спроведе тендер за изградба на нова фотоволтаична централа со моќност од 12 мегавати на сопствено земјиште, како еден од најголемите фотоволтаични проекти во земјата од таков вид. Од компанијата се надеваат дека оваа инвестиција особено поволно ќе влијае врз финансиските резултати на компанијата и енергетскиот микс на земјата, бидејќи ќе замени скап увоз на енергија.
.webp){kind=icon}
