.webp){kind=icon}
„Индид“ (Indeed Inc.), компанија за онлајн барање работа, воведе исплата од 10.000 долари за преселување на трансродовите вработени или оние со трансродови деца, сигнализирајќи нов фронт во корпоративното противење на државните регулативи што го ограничуваат животот на ЛГБТК-луѓето.
Иако „Индид“ им ја претстави програмата на своите вработени во јули, компанијата досега не се огласи јавно за тоа.
Набргу откако компанијата ја објави иницијативата, Сем Бургер, 30-годишен виш креатор на содржини, вработен таму, го напуштил својот роден град Остин во Тексас и се преселил во Денвер, Колорадо, место за кое верува дека ќе биде понаклонето кон оние што се изјаснуваат поинаку од мнозинството. Парите од програмата отишле за преселувањето, кое, според него, досега го чинело 5.000 долари.
„Штом дознав дека ќе ги добијам парите, ми падна камен од срцето“, вели Бургер, кој е свесен дека многу трансродови работници ги немаат истите опции.
Традиционално, компаниите плаќаа такви трошоци само кога бараа вработен да се пресели на нова локација. Барајќи од работодавците финансиска помош кога се преселуваат од лични причини - избегнувајќи работи како што се државните закони за ЛГБТК и повисоки даноци - Бургер и сличните на него покажуваат моќ на пазарот на трудот, кој веќе има недостиг, велат експертите за корпоративни преселби. Ниту еден од експертите со кои контактирале не слушнал за некоја друга компанија што спроведува таква иницијатива и нуди преместување за трансродовите работници.
Овој потег може да ја направи компанијата цел на конзервативните групи, кои продолжуваат да вршат притисок врз компаниите да ја намалат поддршката за причините за ЛГБТК. „Таргет корп“ (Target Corp.) и пивото бад лајт оваа година се соочија со протести, прво од конзервативците вознемирени поради програмите за маркетинг на трансродови лица, а потоа и од ЛГБТК-заедницата поради напуштањето на тие програми по падот на продажбата.
Маев Дували, поранешна директорка за комуникации во „Голдман сакс груп“ (Goldman Sachs Group Inc.) и авторка на книга што го прикажува нејзиното искуство со идентификување како трансродова жена, рече дека компаниите што ќе изберат да го следат менаџментот на „Индид“ мора да бидат посветени на одлуката и да се подготват за реакција. „Сигурно не сакате да се повлечете“, рече таа.
Повеќе од 20 држави донесоа закони насочени кон ограничување на родовата афирмација на малолетниците, според страницата за мониторинг управувана од ЛГБТК-групата „Кампања за човекови права“ (ХРЦ -HRC). Тексас, Флорида, Тенеси и Северна Дакота се меѓу државите што донесоа најмногу нови закони што се сметаат за анти-ЛГБТК, соопшти ХРЦ.
Откако Тексас и Флорида ги усвоија своите закони, ЛГБТК вработените во „Индид“ (Indeed) изјавија дека се чувствуваат непријатно за својата лична иднина во тие држави. Мисти Гејтер, потпретседателка на „Индид“ задолжена за различност, правичност, вклучување и припадност, рече дека компанијата се консултирала со својата група на вработени ЛГБТК за тоа како најдобро да одговори.
„Компанијата ќе ја покрие секоја даночна обврска настаната на исплата од 10.000 долари, што се смета за приход“, рече Гајтер. Засега Бургер е еден од ретките вработени што се пријавиле на програмата. „Стипендијата за преместување одговара на годишната граница од 10.000 американски долари за надомест на медицински патни трошоци надвор од државата“, додаде таа.
Гејтер рече дека компанијата со седиште во Тексас знае дека може да го навлече гневот на државните функционери за воведување политики што би можеле да се сметаат за критични кон нивните постапки, додавајќи дека „ова можеби не е добро решение за сите компании“.
А откако Бургер се пресели во Денвер со своето куче и двете мачки, се чувствува подобредојдено. Тој се надева дека ќе има операција за промена на полот и хормонска терапија и додава дека новата клиника во која ќе оди е многу попријатна од медицинските услуги во Остин.
„Осигурувањето на ’Индид’ ќе ги покрие сите трошоци“, рече Бургер. „Луѓето сакаат да работат во компанија за која чувствуваат дека се грижи за своите вработени“, додаде тој.
