.webp){kind=icon}
Илон Маск ги намали очекувањата за резултатите на „Тесла“ (Tesla Inc.) бидејќи годините на брза експанзија доаѓаат во конфликт со зголемените каматни стапки и потрошувачите што се ориентирани кон штедење.
По неколкумесечно постојано намалување на цените, маржите на „Тесла“ паднаа под нивото што неодамна го постави нејзиниот поранешен финансиски директор. Компанијата „немилосрдно“ ги намалува внатрешните трошоци, според шефот на инженерството на возила Ларс Морави. Сепак, Маск е „параноичен“ за непредвидливото економско опкружување, поради што „Тесла“ го забавува отворањето на својата нова фабрика во Мексико.
„’Тесла’ е неверојатно способен брод“, рече Маск. „Нема да потонеме, но дури и голем брод има предизвици во бура“.
Коментарите на Маск доаѓаат откако „Тесла“ објави послаба квартална заработка од очекуваното. Тој исто така се пожали на високите каматни стапки, двете тековни војни и периодот на зголемено производство на „сајбертрак“ (Tesla Cybertruck), за кој рече дека може да биде сличен на „производствениот пекол“ низ кој мина компанијата во минатото.
Акциите на „Тесла“ паднаа за 4,2 отсто на сесијата по работното време во средата, откако паднаа за 4,8 отсто во редовното тргување. Сепак, цената на акцијата е речиси двојно зголемена од почетокот на годината.
Испораки на „сајбертрак“
„Тесла“ објави дека првиот „сајбертрак“ од не’рѓосувачки челик ќе биде испорачан на 30 ноември, со две години задоцнување. Маск предупреди дека овој модел нема значително да придонесе за готовинскиот тек, најмалку 18 месеци.
„Сами си го ископавме гробот со 'сајбертрак'“, им рече Маск на аналитичарите. „Специјалните производи што се појавуваат повремено се исклучително тешки за пазарoт, за постигнување големи количества и остварување профит“.
„’Тесла’ е подготвена дури и да се откаже од етикетите и QR-кодовите на деловите од своите автомобили, ако тоа значи и мала заштеда“, рече Маск.
Компанијата не ги исполни очекувањата како во поглед на заработката, така и за продажбата во кварталот, при што заработката, со исклучок на некои ставки, падна на 66 центи по акција, помалку од 74 центи што ги очекуваа аналитичарите на Волстрит. Иако приходите се зголемија на 23,4 милијарди долари, сепак аналитичарите очекуваа 24,06 милијарди долари.
Bloomberg
Компанијата повеќепати ги намалуваше цените на своите автомобили оваа година, а Маск рече дека е подготвен да се откаже од профитот за да го заштити обемот на продажба. Попустите на најскапото возило, „модел екс“ (Model X), надминаа 30 проценти, што ги прави автомобилите на „Тесла“ подостапни за потрошувачите, кои се соочуваат со висока инфлација и каматни стапки.
Бруто-маржата во автомобилскиот сектор, без регулаторните кредити, падна на 16,3 отсто во текот на кварталот. Аналитичарите анкетирани од „Блумберг“ очекуваа дека ќе биде 17,7 проценти.
Компанијата со седиште во Остин веќе соопшти дека испорачала 435.059 возила низ светот во текот на кварталот, што е прв квартален пад во една година, откако планираното затворање на погоните го забави производството. „Тесла“ неодамна го лансира освежениот седан „модел 3“ (Model 3) во Кина и во Европа.
Маск рече дека „Тесла“ сè уште планира да отвори фабрика во Монтереј, Мексико, но дека засега не е подготвен „да оди со полн гас“ кога станува збор за изградбата, поради состојбата на светската економија. Овие изјави доаѓаат по неколкунеделни шпекулации за тоа дали фабриката, за која првпат беше објавено во март, воопшто ќе биде изградена.
„Тесла“ ги увери инвеститорите дека ќе остане на вистинската насока за годинава да произведе и испорача околу 1,8 милион возила. Компанијата ќе треба да го засили темпото во текот на четвртиот квартал за да ја постигне таа цел.
